Shardarada kúıeý balasy enesiniń altyn buıymdaryn urlap ketken
ShARDARA. QazAqparat – Túrkistan oblysy Shardara aýdanynda kúıeý balasy enesiniń altyn buıymdaryn urlap ketken. Kelgen shyǵyn kólemi - 1 mln 700 myń teńge, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, jábirlenýshi úıine ury túskenin aıtyp, polıtsııaǵa aryzdanǵan.
Aıtýynsha, belgisiz bireý onyń úıine tereze arqyly kirip, jatyn bólmesindegi altyn júzigi men altyn syrǵasyn qoldy etken.
Sondaı-aq, baǵaly brıllıanttary men alqalaryn jymqyryp ketkenin habarlapty.
Osy qylmysty der kezinde ashý maqsatynda Shardara APB qyzmetkerlerinen arnaıy jedel-tergeý toby qurylǵan.
Sóıtip jedel-izdestirý sharalarynyń nátıjesinde kúdiktiniń kim ekeni anyqtalǵan.
Ol jábirlenýshiniń kúıeý balasy bolyp shyqqan.
Tergeý barysynda bergen jaýabynda ol ońaı jolmen aqsha tabý maqsatynda qaraýsyz turǵan úıge kirip, altyn buıymdardy jymqyrǵanyn aıtqan.
«Kúdikti urlaǵan altyndardy úıiniń aýlasyndaǵy garajyna tyǵyp, satýdyń ońtaıly sátin kútken. Búginde polıtseıler kúdiktiden aıǵaqty zat retinde altyn buıymdardy tárkilep, zańdy ıesine qaıtardy. Qazirgi tańda kúdiktige qatysty sotqa deıingi tergep-tekserý jumystary júrip jatyr» delingen habarlamada.
