Shardarada qoıshy quny 23 mln teńgeden asatyn maldy satyp jibergen
Oblystyq PD baspasóz qyzmetiniń málimetinshe, Uzyn ata aýylynda turatyn mal ıesi polıtsııaǵa aryzdanǵan. Ol qoıshyǵa senip tapsyrǵan maldarynyń joǵalýynan ózine 23 mıllıon teńgeden astam shyǵyn kelgenin jetkizgen.
Oqıǵa ornyna barǵan tártip saqshylary qoıshynyń Ordabasy aýdanynyń turǵyny ekenin anyqtaıdy. Belgili bolǵanyndaı, sezikti er adam ótken jyldyń tamyz aıynan beri usaq maldy birtindep satyp, óz paıdasyna jaratyp kelgen. Al muny jábirlenýshi arada jyl ótken soń bilgen. Ol malyn túgendegende 400-den asa qoıdyń jetpeıtinin baıqaǵan. Qazirgi tańda kúdikti ýaqytsha ustaý abaqtysyna qamaldy.
«Kúdiktige qatysty sotqa deıingi tergeý amaldary júrgizile bastady. Atalǵan jaıtty polıtsııa qyzmetkerleri QR QK-niń 189-baby «Senip tapsyrylǵan bóten múlikti ıemdenip alý nemese talan-tarajǵa salý» boıynsha tirkeýge aldy», - delingen polıtsııa habarlamasynda.