Shardarada koronavırýstan jazylǵandar sany kún sanap artýda
ShARDARA. QazAqparat – Túrkistan oblysyndaǵy Shardara aýdanynda qaýipti indetten aıyqqandardyń sany kún sanap artýda. Naýryz aıynan osy kúnge deıin munda PTsR-zertteýden 3180 adam tekserilip, oń nátıje kórsetkender em alýǵa jatqyzylǵan, dep habarlaıdy QazAqparat tilshisi.
Aýdan ákimdiginiń málimetinshe, aýdandyq aýrýhananyń provızor bólimshesinde 40 tósek oryn ashylǵan. Onda osy kezge deıin ókpe qabynýmen 214 naýqas jatqyzylyp, qazirgi tańda 20 naýqas em qabyldaýda. Al, medıtsına qyzmetkerleri 3 aýysymmen jumys atqaryp jatyr. Aýdanda koronavırýs pandemııasynan oń nátıje kórsetken 23 adam anyqtalyp, onyń 19-y tıisti talapqa saı em alǵan. Qalǵandarynyń jaǵdaıy qanaǵattanarlyq jaǵdaıda. Sondaı-aq, aǵymdaǵy jyldyń 3 shildesinen bastap juqpaly aýrýlar ǵımaratynan ınfektsııalyq gospıtalda, provızor bólimshesinde, terapııa bóliminde ókpe qabynýymen túsken naýqastarǵa em kórsetýge arnalǵan 110 tósek oryn daıyndalǵan. Munan bólek terapııa bóliminiń 30 tósek oryny qaıta beıimdelip jáne jańadan 20 tósek oryn bólingen. Búgingi tańda aýdan kóleminde pnevmonııaǵa shaldyqqan 212 naýqas tirkelip, 184 naýqas emdelip shyqqan. Kompıýterlik tomografııa arqyly 60 naýqas anyqtalyp, atalǵan aýrýdan aıyqqandardyń sany kún sanap artýda. Barlyq dárihanalarda negizgi dári-dármek baǵalarynyń qymbattatyp satýyna baqylaý jasalyp, ol boıynsha eriktiler toby kúndelikti baqylaý júrgizýde. Karantın kezinde qurylǵan 6 monıtorıngtik top dárihanalardy kúndelikti aralap, taldaý jasap otyr. Nátıjesinde atalǵan toppen 622 nysanǵa tekserý júrgizilip, karantın rejımin buzǵan 21 nysan ıesine hattama toltyrylǵan. Onyń 2-eýi boıynsha qujattar sotqa joldansa, ózge 73 nysan ıesine eskertý jasalǵan. Jazǵy maýsymda Shardara sý qoımasy jaǵalaýyndaǵy shomylý maýsymynda ashylǵan demalys oryndarynyń jumysy ýaqytsha toqtatylyp, adamdardyń kelýin boldyrmaý maqsatynda polıtsııa bólimimen kezekshilik uıymdastyrylǵan. Munda da mobıldi toptar kúndelikti reıdttik jumystaryn atqarýda. Aýdan kóleminde naýqastardy dári-dármekpen qamtamasyz etý máselesi qolǵa alynyp, Ózbekstan Respýblıkasynyń resmı ókili bolyp sanalatyn «Belasar Interneıshnl» JShS men aýdandaǵy birqatar dárihanalar kelisim-sharttar túzilgen. Elimizdegi ózge de iri kólemdegi kóterme satýshy kompanııalarmen halyqqa eń qajetti degen preparattardy satyp alý jumystary júrgizilýde. Ortalyq aýrýhana qorynda koronavırýstyq ınfektsııa men pnevmonııa aýrýyn emdeý úshin qoldanylatyn dárilik zattardyń 1 aılyq qory jasaqtalyp, qorǵanys zattary men dezınfektsııalyq zattar qory jetkilikti mólsherde jetkizilgen. Aýdan ákimdiginiń uıymdastyrýymen jergilikti kásipkerler tarapynan jan-jaqty bkómekter kórsetilip, olar tarapynan 35 pýlsoksımetr men 1120 ottegi ballondary jáne 19 ottegi kontsentrattyq apparaty aýrýhanalarǵa jetkizilgen.
