Shardarada kópbalaly analarǵa Altyn jáne Kúmis alqalar tabystaldy

ShARDARA. QazAqparat – Túrkistan oblysy, Shardara aýdanynda Alǵys aıtý kúnine oraı turǵyndar bir-birine ystyq qushaq jaıyp, alǵystaryn jaýdyrdy. Aýdan basshysy Qaırat Joldybaı mádenıet úıine jınalǵan qaýymdy quttyqtap, kópbalaly analarǵa Altyn jáne Kúmis alqalardy tabystady, dep habarlaıdy QazAqparat tilshisi.

Merekelik sharaǵa jınalǵan qaýymǵa mádenıet úıiniń ónerpazdary ánnen shashý shashyp, keremet kóńil-kúı syılady. Aıtýly kúnde aýdan ákimi Qaırat Joldybaı kópbalaly analarǵa sanaly urpaq tárbıelep, elimizdiń demografııasyn ósirýge qosqan ólsheýsiz úlesteri úshin alǵys aıtty. Aýdan turǵyndaryna jyly lebizin bildirip, merekemen quttyqtady.

«Alǵys aıtý kúni – mańyzdy merekelerdiń biri. Óskeleń urpaqty otansúıgishtikke, baýyrmashyldyqqa tárbıeleý basty maqsat bolsa, aıtýly kúnniń bereri mol ekeni anyq. Búginde Shardara aýdanynda 30-dan astam ult ókili tatý-tátti tirshilik keshýde. Olar kóktemniń shýaqty kúninde bir birine ystyq yqylas tanytyp, alǵys aıtýmen keledi»,- dedi aýdan ákimi.