Shardarada qarýly qaraqshylar janarmaı beketine shabýyl jasady
Betine medıtsınalyq betperdeni búrkep, qolyna pyshaq, eki aýyzdyq ańshy myltyǵyn, aǵash shoqpar (dýbınka) ustaǵan úsh kúdikti janarmaı beketindegi kassaǵa basa kóktep kirgen.
Olar kassır men onyń kómekshisin qorqytyp, aqsha talap etip, kassadaǵy 120 myń teńgeni alyp ketken.
Keıin beket mańynda kólikte tosyp turǵan tórtinshi sybaılasymen birge boı tasalaǵan.
Shardara men Jetisaı aýdanynyń polıtseıleri qylmyskerlerdiń izine túsip, nátıjesinde kúdiktiniń ekeýin qolǵa túsirdi.
«Qylmys túngi ýaqytta bolǵandyqtan kórgen-bilgen kýágerler joq. Oǵan qosa kúdiktiler jedel qımyldap, qashyp úlgergen. Bizge habar kelisimen olardyń áreketin saraladyq. Eki aýdannyń polıtseıleri birlese otyryp, qaraqshylardyń kóligin oqıǵa ornynan 40 shaqyrym qashyqta ornalasqan Jetisaı aýdanyndaǵy aýyldarynyń birinen toqtatty. Qyzmettik kólikpen sońynan jetken polıtseılerdi kórgen qaraqshylar kólikti tastaǵan kúıi qashýǵa áreket etken. Alaıda polıtseılerdiń kásibı sheberligi nátıjesinde, kúdiktiniń ekeýi dál sol sátte ustaldy», - dedi Túrkistan oblysy polıtsııa departamenti bastyǵynyń orynbasary, polıtsııa podpolkovnıgi Qurmanbek Sahov.
Qazir eki kúdikti qamaýda. Al boı tasalap ketken eki sybaılasy izdestirilip jatyr.