Shardarada elimizde balamasy joq biryńǵaı ahýal ortalyǵy ashyldy

TÚRKІSTAN. QazAqparat - Túrkistan oblysy, Shardara aýdandyq aýrýhanasynda balamasy joq «Bastapqy medıtsınalyq-sanıtarııalyq kómek boıynsha ahýal ortalyǵy» ashyldy. Oblystyq densaýlyq saqtaý basqarmasynyń basshysy Muqan Egizbaevtyń tapsyrmasymen ashylǵan ortalyq emhana jáne statsıonarlyq medıtsınalyq kómektiń sapasy men ashyqtyǵyn jaqsartýǵa yqpal etpek, dep habarlaıdy QazAqparat tilshisi.

Sala mamandarynyń aıtýynsha, jańa ortalyq eń aldymen bastapqy medıtsınalyq-sanıtarııalyq kómek boıynsha jumys isteıdi. Onyń mindetine medıtsınalyq mekemeler men dárigerlerdiń jumysy týraly aqparatty qadaǵalaý jáne óńdeý kirip otyr. Al, tolyqtaı tsıfrlyq júıege qosylǵan ahýal ortalyǵy Túrkistan oblysynyń densaýlyq saqtaý basqarmasynyń bazasynda ashylǵan bolatyn. Bul júıe aımaqtyń densaýlyq saqtaý salasyn baqylaý men basqarýdyń tıimdi quraly bolyp tanylyp otyr. ıAǵnı, árbir aýdan boıynsha medıtsınalyq mekemelerdiń shuǵyl áreket etý sharalaryn qoldaný arqyly onlaın taldaý júrgiziledi.

Ortalyqtyń jumysymen tanysý úshin atalǵan aýdanda «Damý» qorynyń Nur-sultan qalasy men Túrkistan oblysy boıynsha aımaqtyq ókilderiniń qatysýymen arnaıy semınar ótti. Eki kúnge sozylǵan jıynǵa 20 medıtsınalyq uıymnyń 40-tan astam qyzmetkeri qatysyp, jańa júıeni qoldaný ádisin úırendi. Basqosýda oblystyq reıtıngtiń onlaın taldaý modýlin qosý, sondaı-aq BMSK jáne statsıonar qyzmetteriniń damýyna taldaý júrgizildi.

Aıta keteıik, aldaǵy ýaqytta dál osyndaı ortalyqtar Túrkistan oblysyna qarasty barlyq medıtsınalyq mekemede ashylady dep josparlanyp otyr. Osylaısha bastapqy medıtsınalyq-sanıtarııalyq kómek jumysy aýdan ortalyqtarynan shalǵaı aýyldyq jerlerdegi medıtsınalyq qyzmet sapasyn arttyrýǵa baǵyttalady.

«Biz keshendi medıtsınalyq aqparattyq júıemen (KMAJ) jumys isteımiz. Bul júıe árbir medıtsınalyq mekeme jumysynyń barlyq aspektilerin qadaǵalaýǵa múmkindik beredi. Biz qandaı da bir mamanǵa qabyldaýdyń ortasha ýaqytyn, kómek surap kelgenderdiń sanyn, olardyń dıagnozdaryn, úıge shaqyrýlardy oryndaý ýaqytyn, Patronajdy jáne t.b. tustaryn tolyq kórip otyrmyz. Osylaısha, dárigerlik qyzmetterdiń sapasyn arttyrýǵa den qoıa alamyz. Bul onlaın rejiminde óńirimizdegi barlyq medıtsınalyq mekemelerde ne bolyp jatqanynan habardar bolýǵa múmkindik beredi. Osy arqyly emhanalar men aýrýhanalardaǵy júktemeni bilip jáne medıtsınalyq qyzmetkerlerdiń jumysyn tolyq baqylaı alamyz»,- deıdi ahýal ortalyǵynyń úılestirýshisi, Shardara aýdandyq aýrýhanasynyń bas dárigeri Janar Ospanova.