Shardarada dári-dármekti shekti baǵadan asyryp satý derekteri tirkeldi
ShARDARA. QazAqparat – Túrkistan oblysy, Shardara aýdanynyń ákimi Qaırat Joldybaı arnaı shtab múshelerimen birge dárihanalardy aralap, dárilik zattardyń satylýy men shekti baǵanyń saqtalýyna monıtorıng júrgizdi.
Top músheleri dárihanalardaǵy preparattardyń qoljetimdiligi men shekti baǵadan qymbat satý faktilerin, zańsyz saýdalaý jáne túbirteksiz ótkizý derekterin tekserdi, dep habarlaıdy QazAqparat tilshisi.
QR Sybaılas jemqorlyqqa qarys is-qımyl agenttiginiń Túrkistan oblysy boıynsha departamentiniń Saryaǵash aımaǵy boıynsha aýdanaralyq basqarmasynyń basshysy Sapar Jantóreev pen prokýratýra organdary, quzyrly organ ókilderi qatysqan reıd barysynda birqatar zańbuzýshylyqtar anyqtaldy.
Atap aıtqanda, aýdan ortalyǵyndaǵy bazar mańynda «Sabyrbekova» atty dárihanada «Azıtromıtsın» men «Aspırın kardıo» preparattary tym qymbat satylyp jatqany belgili boldy. Mundaı zańbuzýshylyqtarǵa ózge de dárihana qyzmetkerleri jol berip jatqany anyqtaldy. Reıd barysynda aýdan basshysy dárihana ıelerine arnaıy bekitilgen dári-dármekterdi tek retseptimen saýdalaýdy, 1 azamatqa belgilengen dárilerdi 2 danadan artyq satpaý kerektigin eskertti. Sondaı-aq, dári-dármekterdi satý barysynda elimizdiń Densaýlyq saqtaý mınıstrligi bekitken shekti baǵalardy qatań saqtaýdy jáne maskalyq rejımdi únemi baqylaýda ustaý qajettigin jetkizdi. Al, shtab múshelerine anyqtalǵan kemshilikter boıynsha zańǵa sáıkes tıisti jumystardy atqarýdy tapsyrdy.
Aıta keteıik, dárihanalarda dári-dármek baǵasynyń kóterilý deregi tirkelgen jaǵdaıda shardaralyq kez-kelgen tutynýshy +7776 837 09 00 nemese +7702 000 24 94 nómirlerine Whatsapp jelisi arqyly habarlasyp, shaǵym túsire alady. Aýdandaǵy dárihanalarǵa tıisti monıtorıngtik jumystar áli de jalǵasyn tappaq.
