Shardarada bas ımamǵa qatysty shaǵym boıynsha tekserý bastaldy

TÚRKІSTAN. KAZINFORM — Aýdannyń din qyzmetkeri jaǵdaıǵa beıjaı qaramaýdy surap, áleýmettik jelide vıdeo úndeý jasady.

Ózin Shardara aýdany, Jaýshyqum aýyldyq okrýgine qarasty Qonar ata meshitiniń azanshysy dep tanystyrǵan Júnis Sartaev esimdi azamat aýdannyń bas ımamynyń qyzmetine qatysty birqatar máseleni kóterdi. Onyń aıtýynsha, bas ımam sońǵy bir jarym jyl kóleminde ımamdyq etip namaz júrgizbegen. Din qyzmetkerlerine shákirtterdiń kózinshe dóreki sózder aıtyp, boqtap balaǵattaıtyn bolǵan.

— Bas ımamymyzdyń juma namazynda qutpaǵa shyǵyp, juma júrgizgenin óz kózimmen kórmedim. Kóbine meshittiń qasyndaǵy keńsede telefon shuqalap otyrady. Kommýnaldyq tólemder kelgen kezde qarajatty jamaǵat esebinen jınatady. Keıde shákirtterdiń kózinshe dóreki sózder aıtyp, balaǵattaǵan sátteri de boldy. Osyǵan baılanysty biz bas múftııattan arasha surap, shara qoldanýdy suraımyz, — deıdi Júnis Sartaev.

Atalǵan shaǵym boıynsha Qazaqstan musylmandary Dinı basqarmasy Túrkistan oblysy boıynsha ókildigi arnaıy komıssııa quryp, jaǵdaıdy ádil ári obektıvti túrde qarastyrý maqsatynda tekserý jumystaryn bastap ketti.

— Shardara aýdanynyń bas ımamy Marat Asanov qyzmetinen bosatý týraly ótinish bergenine baılanysty, 2025 jyldyń 6 qazanynan bastap qyzmetinen bosatyldy, — delingen ókildik tarapynan usynylǵan aqparatta.

Aıta keteıik, budan buryn Túrkistan oblysynda jasóspirimge azǵyndyq áreket jasaǵan muǵalim sottalǵanyn jazǵan bolatynbyz.