Shardarada baqtashy 30 mln teńgeniń malyn ysyrap etip, joq qylǵan
ShARDARA. QazAqparat - Túrkistan oblysynda baqtashy bireýdiń 30 mıllıon turatyn malyn joq qylǵan, dep habarlaıdy QazAqparat oblystyq PD baspasóz qyzmetine silteme jasap.
Shardara polıtsııasyna Jetisaı aýdany turǵyndarynyń biri aryzdanyp keldi. Onyń aıtýynsha, 2017 jyly Shardara aýdanyna qarasty qumdaǵy qudyqta ózine tıesili 617 bas usaq maldy ózara kelisimshart boıynsha jyldyq tóldiń 50%-yn baǵatyn bolyp Shardara aýdanynyń turǵynyna senip tapsyrǵan. Bıylǵy 4 maýsymda qoılaryn sanaýǵa kelgen ol árqaısysy 35 000 teńge bolatyn 617 bas saýlyq qoıyn, quny 60 myń teńge bolatyn 15 qoshqaryn, quny 200 000 teńge bolatyn bıylǵy 307 bas qozysyn jáne quny 400 000 teńge bolatyn 1 jylqysyn baqtashynyń ysyrap etkenin kóredi. Materıaldyq shyǵyn kólemi - 30 mıllıon teńgege jýyq.
«Atalǵan jaıt QR QK 189-baby boıynsha tirkeldi. Polıtsııa qyzmetkerleri jedel is-shara barysynda baqtashy bolyp jumys istegen Jetisaı aýdanynyń turǵynyn ustady. Polıtsııa qyzmetkerleriniń anyqtaýynsha, jábirlenýshi 617 bas qoıyn baqtashyǵa berip, ol mal basynyń ósýi men saqtalýyn baqylaýǵa mindettenedi. Alaıda, kúdikti eki jyl ishinde oǵan senip tapsyrylǵan maldy zańsyz ysyrap etip, satyp jibergen» delingen habarlamada.
Qazirgi ýaqytta bóten múlikti ıemdený jáne ysyrap etý deregi boıynsha sotqa deıingi tergeý amaldary júrgizilýde. Kúdikti eshqaıda ketpeý jóninde qolhat bergen. Saraptama taǵaıyndalǵan.
Túrkistan oblysynyń polıtseıleri óz kezeginde mal ıelerine qyraǵy bolý jáne óz múlkiniń saqtalýyn qadaǵalaý qajettigin eskertedi. Úı malyn jaıylymda qaraýsyz qaldyrýǵa, sondaı-aq ony tanymaıtyn adamdarǵa baǵýǵa berýge bolmaıdy.
