Shardarada «Aýyl – el besigi» baǵdarlamasy aıasynda joldar jóndelýde
ShARDARA. QazAqparat – Túrkistan oblysy, Shardara aýdanynda «Aýyl – El besigi» baǵdarlamasy aıasynda joldar jóndelýde. Aǵymdaǵy jyly aýdan ortalyǵy men aýyldardyń arasyndaǵy joldar retke keltirý jumystary karantındik rejımniń saqtalýyna qaramastan jalǵasýda, dep habarlaıdy QazAqparat tilshisi.
Kólik júrgizýshileri men jaıaý júrginshilerdiń eshbir qıyndyqsyz erkin júrip-turýlaryna jaǵdaı jasaý maqsatynda shaǵalaly aýdanda 21 kósheni jóndeý josparlanǵan. Onyń ishinde jalpy uzyndyǵy 9,84 shaqyrymdy quraıtyn Ońdasynov, Túgelbaev, Áıteke bı, Tóle bı jáne Jibek joly kósheleri bar. Aýdan ákimi Qaırat Joldybaıuly atqarylyp jatqan jumystardy óz baqylaýyna alǵan. Al «Jumyspen qamtýdyń jol kartasy 2020» baǵdarlamasy aıasynda Tóle bı kóshesi boıyndaǵy jelili saıabaǵy men Jibek joly kóshesi, «Úsh arys» skverin abattandyrý jumystary qarqyndy júrgizilýde.
«Júrgizilip jatqan jumystardyń sapasy qatań baqylaýda. Jóndeýge qajetti qurylys materıaldary otandyq, arnaıy lıtsenzııasy bar. Jumys bekitilgen kestege sáıkes ýaqtyly, bekitilgen standart-talaptarǵa saı júrgizilip keledi. Basty maqsat – turǵyndardyń eshbir qıyndyqsyz júrip-turýlaryna jaǵdaı jasap, memleketten qaralǵan qarjynyń árbir tıynyn maqsatty jumsaý bolyp otyr»,- deıdi aýdandyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń basshysy Erbol Shaǵyrbaev.
Aıta keteıik, budan bólek qalada ornalasqan 10-ǵa jýyq saıabaqtardyń qorshaýlary rettelýde. Sondaı-aq, jol boıyndaǵy jaryqshamdar aýystyrylyp, jaıaý júrginshilerge arnalǵan aıaqjoldar jóndelip jatyr.
