Shardarada aýrýhana ákimshiligi 1 keli makorondy 4800 teńgeden almaq bolǵan
TÚRKІSTAN. KAZINFORM — Eriktilermen birge memlekettik satyp alý portalynda baǵany baqylaý boıynsha monıtorıng jumystary udaıy júrgizilip keledi. Nátıjesinde bıylǵy jyldyń 9 aıynda 3,2 mlrd teńge kóleminde bıýdjet qarajaty únemdeldi. Bul jaıynda Sybaılas jemqorlyqqa qarsy is-qımyl agenttiginiń Túrkistan oblysy boıynsha departament basshysy Murat Tóleýbaev málimdedi.
Máselen, Shardara ortalyq aýdandyq aýrýhanasy 2 600 teńge turatyn glıýtensiz spagettı makaron ónimderiniń 1 kelisin 4 800 teńgeden alýdy josparlasa, Túlkibas aýdandyq ortalyq aýrýhanasy naryqtaǵy baǵasy 439 900 teńge turatyn kóshirý apparatyn 9,4 mln teńgege satyp alýdy kózdegen.
Sonymen birge, Túrkistan qalasy, Qazyǵurt jáne Maqtaaral aýdan ákimdikterimen josparlanǵan 9 qyzmettik kólikterdiń baǵasy qaıta qaralyp, nátıjesinde 98,6 mln teńge bıýdjet qarjysy únemdeldi.
«Memlekettik satyp alýdy asa joǵary baǵamen alýdy josparlaǵan mekemelerge baǵany qaıta qaraý týraly usynystar joldanyp, baǵalar medıandyq baǵa turǵysynan qaıta qaraldy» — dedi Murat Tóleýbaev.
Sondaı-aq, laýazymdy tulǵalardyń qylmystyq quqyq buzýshylyqtar jasaýynyń aldyn alýda ákimshilik jaýapkershilik baǵytyndaǵy jumystar turaqty túrde júrgizilip keledi.
Jyl basynan bergi 9 aıda jemqorlyq ákimshilik quqyq buzýshylyq jasaǵan 10 laýazymdy tulǵa ákimshilik jaýapkershilikke tartylyp, olarǵa 6,6 mln teńge aıyppul salynǵan.
