Shardarada aýyz sýmen qamtý jumystary qatań baqylaýda tur
TÚRKІSTAN. KAZINFORM – Túrkistan oblysynyń ákimi Nuralhan Kósherov Shardara aýdanyna jumys saparymen baryp, qala turǵyndaryn aýyz sýmen qamtý baǵytyndaǵy jumystardyń barysyn tekserdi.
Óńir basshysy Shardara qalasynyń bas sý torabynda mamandarmen kezdesip, naqty tapsyrmalar júktedi. Budan keıin jańa uńǵyma qazý jumystarymen jáne sý tapshylyǵynyń aldyn alýǵa baǵyttalǵan sharalarmen tanysty.
4 tamyzdaǵy jaǵdaı boıynsha, «Shardara» sý qoımasynda 401 mln tekshe metr sý tirkelgen. Sý kelimi – 144 m³/sek, shyǵymy – 331 m³/sek. Shardara qalasynda 31 883 turǵyn, 6 520 abonent, 85 kópqabatty turǵyn úı (1 687 páter) jáne 4 833 jeke turǵyn úı bar. Aýyz sý tasymaldaýdy qajet etetinder – 85 kópqabatty úı (6 748 adam) jáne 64 jeke úı (332 adam).
Sý tapshylyǵyna qarsy is-qımyl algorıtmi bekitildi
Sý kóleminiń tómendeýine baılanysty oblys ákiminiń tapsyrmasymen jedel áreket etý algorıtmi bekitilip, táýekelderdi basqarý jónindegi shtab quryldy. Nátıjesinde kópqabatty úıler ornalasqan «Abaı», «Qyzyljar», IV jáne «Asem-aı» yqsham aýdandaryna 28 dana, kólemi 2 tonnadan turatyn sý jınaý ydystary ornatylyp, aýyz sýmen toltyryldy. Bul rezervýarlardy turaqty sýmen qamtý úshin 10 arnaıy sý tasymaldaýshy kólik jumyldyryldy. Sý kózi retinde «Óteǵul» shaǵynaýdanynyń uńǵymasy paıdalanylýda.
Buǵan qosa, 3 jekemenshik uńǵyma men 15 sý tasymal kóliginiń ıelerimen kelissóz júrgizilip, baǵany kótermeý máselesi túsindirildi. Qudyǵy bar úılerge sý jetkizý de jalǵasyp jatyr.
Uńǵymalar burǵylanyp jatyr
Qaladaǵy bas sý torabyn balamaly sý kózderimen tolyqtyrý maqsatynda jańa uńǵymalar burǵylaý jumystary bastalǵan. Qazir birinshi uńǵymadan 84 metr tereńdikten sý shyqty, tik qubyr ornatylyp, kózdi ashý jumystary júrgizilýde. Ekinshi uńǵyma 30 metrge deıin qazyldy, jumys jalǵasýda.
Qosymsha nasos iske qosylady
Sý deńgeıiniń tómendeýinen bas sý torabynyń birinshi kóterilimindegi sorǵy jumysyna qajetti kólem jetispeýine baılanysty, 630 tekshe metr sý berýge arnalǵan ponton ústindegi nasos qondyrǵysyn qosý sharalary qolǵa alyndy. Bul iske oblys ákimi, aýdan basshylyǵy men jergilikti turǵyndar belsene atsalysty.
Aýyz sýǵa jaýapty mamandar bekitilgen. Jaǵdaı turaqty jáne jergilikti bıliktiń turaqty baqylaýynda.
Aıta keteıik, buǵan deıin Shardara sý qoımasynda sý deńgeıiniń tómendeýinen qalada aýyz sý tapshylyǵy týyndaǵany habarlanǵan.