Shardarada ákesine qol kótergen azamat meshitte azanshy bolǵan emes – bas ımam

TÚRKІSTAN. KAZINFORM – Qazaqstan musylmandary dinı basqarmasy áleýmettik jeli qoldanýshylaryn tekserilmegen, jalǵan aqparat taratpaýǵa shaqyrdy.

Áleýmettik jelilerde Túrkistan oblysy, Shardara aýdanynda ákesin urǵan azamattyń «meshittiń azanshysy» ekeni jóninde taraǵan aqparat shyndyqqa janaspaıdy. Bul jaǵdaıǵa baılanysty Qazaqstan musylmandary dinı basqarmasynyń Túrkistan oblysy jáne Túrkistan-Ahmet ıAssaýı meshitiniń bas ımamy Erjan Tólepov resmı túsinikteme berdi.

— Atalǵan azamat Qazaqstan musylmandary dinı basqarmasyna qarasty din qyzmetkeri emes. Ol meshitte eshqashan azan aıtyp, resmı dinı qyzmet atqarmaǵan. Din salasyna qatysy joq, negizgi kásibi — mádenıet salasy, qosymsha toı júrgizýshisi (tamada) bolǵan, — dedi bas ımam.

Sonymen qatar, QMDB mundaı áreketterdi qatań aıyptaıtynyn jetkizdi. «Ata-anaǵa qurmet — árbir musylmannyń basty mindeti. Sondyqtan qoǵamdy, ásirese BAQ ókilderi men áleýmettik jeli qoldanýshylaryn tekserilmegen, jalǵan aqparat taratpaýǵa shaqyramyz», — delingen málimdemede.

Aıta keteıik, budan buryn Túrkistan oblysynda ákesin uryp, qorlyq kórsetken turǵyn qamaýǵa alynǵanyn jazǵan bolatynbyz.