Shardarada 80 keliden astam zańsyz aýlanǵan balyq tárkilendi
TÚRKІSTAN. KAZINFORM — Qazir sotqa deıingi tergeý amaldary júrgizilip jatyr.
Tabıǵatty qorǵaý zańnamasynyń buzylýyn boldyrmaý maqsatynda júrgizilgen reıd barysynda sý qoımasynda zańsyz balyq aýlaýmen aınalysqan adamdar ustaldy.
Shardara aýdanynyń eki turǵynynan qaıyq, 1200 metr balyq aýlaý tory jáne 80 keliden astam zańsyz aýlanǵan balyq tárkilendi.
— Jedel-profılaktıkalyq is-shara kezinde Shardara aýdanynyń polıtsııasy men prokýratýra qyzmetkerleri Shardara sý qoımasy ýchaskeleriniń birinen zańsyz balyq aýlaý faktisin anyqtady. Qazirgi ýaqytta balyq resýrstaryn zańsyz óndirý faktisi boıynsha sotqa deıingi tergeý amaldary júrgizilip jatyr. Bolǵan oqıǵanyń barlyq mán-jaılary anyqtalyp jatyr. Polıtseıler azamattardy, tabıǵatty qorǵaý zańnamasyn saqtaýǵa shaqyrady, — delingen Túrkistan oblysy polıtsııa departamentiniń baspasóz qyzmeti taratqan aqparatta.
Aıta keteıik, budan buryn Túrkistan oblysynda týystaryn aıaýsyz óltirgen kúdiktilerge qatysty sot otyrysy bastalǵanyn jazǵan bolatynbyz.