Shardarada 31 myńnan astam turǵyndy aýyz sýmen qamtamasyz etetin sý qubyry paıdalanýǵa berildi
ASTANA. KAZINFORM – QR Premer-mınıstriniń orynbasary Qanat Bozymbaev Túrkistan oblysyna jumys sapary barysynda «Tama-Tastanbek» toptyq sý qubyryn paıdalanýǵa berý rásimine qatysty. Memleket basshysynyń tapsyrmasy boıynsha Úkimettiń qoldaýynyń arqasynda ázirlengen bul joba eki jyl ishinde júzege asyryldy. Іs-sharaǵa sondaı-aq Sý resýrstary jáne ırrıgatsııa mınıstri Nurjan Nurjigitov pen Túrkistan oblysynyń ákimi Nuralhan Kósherov qatysty.
Joba Shardara qalasynyń 31 myńnan astam turǵynyn sapaly aýyz sýmen qamtamasyz etip, qalany Shardara sý qoımasyna táýeldilikten aryltady. Qurylys-montaj jumystary barysynda jalpy uzyndyǵy 39,3 shaqyrymdy quraıtyn eki magıstraldyq sý qubyry tartylyp, taza sýǵa arnalǵan tórt rezervýar men sý tazartý qondyrǵysy salyndy. Sondaı-aq birinshi jáne ekinshi kótergish sorǵy stansalary boı kóterdi. Budan bólek, tereńdigi 110 metr bolatyn 14 uńǵyma burǵylanyp, 133 qudyq kamerasy ornatyldy.
– Eldi mekenderdi sapaly aýyz sýmen qamtamasyz etý memlekettik saıasattyń basty basymdyqtarynyń biri bolyp qala beredi. Buǵan deıin Shardara qalasynyń aýyz sýmen qamtylýy Shardara sý qoımasynyń jaǵdaıyna tikeleı baılanysty edi. Endi zamanaýı talaptarǵa saı júzege asyrylǵan aýqymdy jobanyń arqasynda qala turǵyndary táýlik boıy «Tama-Tastanbek» jerasty ken ornynan alynatyn sapaly aýyz sýmen qamtamasyz etiledi. Bul joba 31 myńnan astam turǵynnyń ómir súrý sapasyn jaqsartyp, óńirdegi áleýmettik turaqtylyqty nyǵaıtýǵa eleýli úles qosady. Qurylysshylarǵa, ınjenerlerge, mamandarǵa jáne jobany júzege asyrýǵa atsalysqan barsha azamatqa shynaıy alǵysymdy bildiremin, - dedi vıtse-premer.
Túrkistan oblysynyń Jetisaı aýdanynda Qanat Bozymbaev «Táýelsizdikke 20 jyl» kanalynyń №1, №2 jáne №3 sorǵy stansalaryn jańǵyrtý jobasynyń júzege asyrylý barysymen tanysty. Bul stansalarda 28 sorǵy agregaty ornatylǵan. Olar «Dostyq» magıstraldyq kanaly arqyly sý jetkiliksiz kelgen jaǵdaıda, Shardara sý qoımasynan sýdy mehanıkalyq tásilmen kóterýge arnalǵan.
«Táýelsizdikke 20 jyl» kanaly sekýndyna 60 tekshe metrge deıin sý ótkize alady. Nysannyń jobalyq sý ótkizý qýatyn qalpyna keltirip, aýyl sharýashylyǵy alqaptaryn turaqty sýmen qamtamasyz etý maqsatynda kúrdeli jóndeý jumystaryn júrgizý josparlanǵan. Joba aıasynda kanaldyń 10,1 shaqyrymy betonmen qaptalyp, onyń sý ótkizý qýaty jobalyq kórsetkishterge deıin qalpyna keltiriledi. Sonyń nátıjesinde shamamen 60 myń gektar aýyl sharýashylyǵy jerin sýarý jaǵdaıy jaqsaryp, nysan boıynda ornalasqan turǵyn úılerdiń qaýipsizdigi de qamtamasyz etiledi.
Jetisaı aýdanynda bolǵan sapar barysynda vıtse-premer óńirdegi vegetatsııa kezeńiniń ótý barysymen de tanysty. Atap aıtqanda, bıyl Túrkistan oblysynda Aýyl sharýashylyǵy mınıstrliginiń Jol kartasynda kózdelgen ylǵaldy kóp qajet etetin daqyldardy egý lımıti saqtalǵany atalyp ótti. Sonyń nátıjesinde qazirgi vegetatsııa kezeńi turaqty ótip jatyr, al «Qazsýshar» RMK-men kelisimshart jasaǵan barlyq sharýa sýarmaly sýmen ýaqytyly qamtamasyz etilip jatyr.
Aıta keteıik, byltyr Qanat Bozymbaevtyń tóraǵalyǵymen Qazaqstannyń ońtústik oblystarynda bıylǵy vegetatsııa kezeńine daıyndyq máseleleri boıynsha kóshpeli keńester ótken bolatyn. Sharýalarmen kezdesýlerde ylǵaldy kóp qajet etetin daqyldardyń kólemin odan ári qysqartyp, egis alqaptarynyń qurylymyn ártaraptandyrý qajettigi erekshe atalyp ótti. Bıyl qol jetkizilgen nátıjelerdi eskere otyryp, Sý resýrstary jáne ırrıgatsııa mınıstrligi aldaǵy ýaqytta da Aýyl sharýashylyǵy mınıstrliginiń Jol kartasynda belgilengen maqsatty ındıkatorlarǵa sáıkes jumysty jalǵastyrady.
Aıta keteıik, bes ońtústik óńirge sý paıdalaný lımıti bekitildi.
