Shardarada 150 myń tonna júgeri óńdeıtin zaýyt salynyp jatyr
ASTANA. KAZINFORM — Túrkistan oblysynda geografııalyq jáne klımattyq erekshelikterge saı úsh negizgi klaster — maqta-toqyma, júgeri, jáne et baǵyttary qarqyndy damyp keledi. Bul týraly oblys ákimi Nuralhan Kósherov eseptik kezdesýde aıtty.
Ákimniń aıtýynsha, maqta-toqyma klasteri elıtalyq sorttaǵy maqta ósirýden bastap, jip, mata jáne djınsy ónimderin shyǵarýǵa deıingi tolyq óndiris tizbegin qamtıdy.
— Maqta klasterinde 5 jobany iske asyrý nátıjesinde 7 myńnan asa jumys orny ashylyp, 201 mlrd teńge ınvestıtsııa tartylady. Maqta ónimdiligi 2-3 esege artyp, kórsetkishi 60 tsentnerge jetedi. Nátıjesinde, 229 myń tonna maqta óńdeledi, — dedi N. Kósherov elordada Ortalyq kommýnıkatsııalar qyzmetinde ótken brıfıngte.
Onyń aıtýynsha, bıyl pılot retinde Otyrar aýdanynda 32 myń gektar alqapqa jańa ádispen maqta egilgen. Nátıjesinde, 45 tsentner maqta jınalǵan.
2 maqta óńdeý zaýyty jáne 2 sý únemdeý tehnologııasyn shyǵaratyn óndirisi iske qosylyp, jip ıirý fabrıkasynyń qurylysy aıaqtalyp qaldy.
Júgeri klasteri boıynsha Shardarada «Qazkrahmal» zaýyty salynyp jatyr. Kásiporyn keler jyldyń birinshi toqsanynda iske qosylady, 251 jumys orny ashylady. Jalpy 150 myń tonna júgerini tereń óńdep, 26 túrli ónim shyǵarady.
— Et klasteri baǵytynda 7 joba iske asyrylýda. Jobanyń quny — 50 mlrd teńge, 802 jumys orny ashylady. Ortalyq Azııada teńdesi joq 50 myń iri qara mal bordaqylaý jáne et ónimderin tereń qaıta óńdeıtin iri keshender, zamanaýı mal bırjasy salynyp jatyr, — dedi oblys ákimi.
Ákimniń sózinshe, atalǵan 3 klasterdi damytý esebinen 2026 jyly jeńil ónerkásipti 220 mlrd teńgege, aýyl sharýashylyǵyn qosymsha 433 mlrd teńgege ulǵaıtý josparlanyp otyr.
Aıta keteıik, Túrkistan oblysynda beınekamera, medıtsınalyq jıhaz, turmystyq hımııalyq buıymdar shyǵarylmaq.
Buǵan deıin Túrkistan oblysynyń ákimi ımportty almastyratyn 20 joba iske asyrylyp jatqanyn aıtqan edi.