Shardara sý qoımasynyń jaǵalaýynan 60 týrıstik nysan salynady
ShYMKENT. QazAqparat - Shardara sý qoımasynyń jaǵalaýynan 60 týrıstik nysan salynady. Bul týraly búgin Óńirlik kommýnıkatsııalar qyzmetinde ótken brıfıngte Shardara aýdanynyń ákimi Bolatbek Qystaýov málim etti, dep habarlaıdy QazAqparat HAA tilshisi.
Ákimniń sózinshe, aýdanda týrızm salasyn damytý maqsatynda atalǵan nysandardy salýǵa 6,7 mlrd. teńgeden astam ınvestıtsııa tartylady dep josparlanyp otyr.
Elbasynyń Qazaqstan halqyna arnaǵan «Qazaqstannyń úshinshi jańǵyrýy: jahandyq básekege qabilettilik» atty Joldaýynda júktelgen mindetterdiń oryndalýy boıynsha baıandaǵan aýdan basshysy búginde Shardarada 36 gektar aýmaqta ındýstrııaldy aımaq qurylyp, onda kásipkerlerge qajetti ınfraqurylym jumystary júrgizilip jatqandyǵyn atap ótti.
Munan bólek, ol Shardara aýdany balyq óńdeý boıynsha oblys kóleminde kósh bastaýshy aımaq ekenin aıtyp, bul baǵytta ótken jyly jumys istep turǵan 3 balyq zaýyty jalpy 4 myń tonnaǵa jýyq balyq óńdep, 3,2 mlrd. teńgeniń ónimin óndirgenin málimdedi. Al onyń 80 paıyzdan astamy shetelge eksporttalǵan. Sonymen qatar, bıyl jyldyq qýattylyǵy 600 tonnany quraıtyn taǵy bir balyq óńdeý zaýyty iske qosylyp, 30 adamdy jumyspen qamtyǵan. Aldaǵy ýaqytta jańadan ashylǵan kásiporyndardyń esebinen balyq ónimderiniń kólemin 30%-ǵa arttyrý josparlanyp otyr.
Brıfıngte Bolatbek Qystaýov «Nurly jer» turǵyn úı baǵdarlamasy aıasynda Shardara qalasyndaǵy Astana jáne Ál-Farabı kóshelerinen 40 páterli kópqabatty 2 turǵyn úıdiń qurylysy bastalatynyn da jetkizdi.
«Qurylys nysandary boıynsha búgini tańda jobalaý-smetalyq qujattar ázirlenip jatyr. Al bıylǵy jyly úsh aýyldyq okrýgte, ıaǵnı, Sútkent, Aqsheńgeldi, Egizqum aýyldarynda jergilikti bıýdjetten bólingen 64 mln. teńgege bir páterli 9 úıdiń qurylysy aıaqtalyp, paıdalanýǵa beremiz dep otyrmyz. Jalpy Shardara aýdanynda búgingi tańda 996 otbasy turǵyn úı kezeginde tirkelgen. Olardyń ishinde 126-sy jetim balalar men ata-anasynyń qamqorlyǵynsyz qalǵan balalar»,-dedi aýdan ákimi.
