Shardara sý qoımasynyń túbin tazartý bastaldy
«Sý qoımasy 1966 jyly salynǵan jáne kólemi boıynsha elimizde úshinshi orynda tur. Shardara sý qoımasynda sońǵy ret batımetrııalyq zertteý 1977 jyly iske asyrylǵan. Sol kezde sý qoımasynyń kólemi 5,2 mlrd tekshe metr boldy. Ýaqyt óte kele sý qoımasynyń túbi birtindep shógindilerge tolyp, sý qoımasynyń kóleminiń ózgerýine ákelip soqqan. Jańa batımetrııalyq túsirilim sý qoımasynyń naqty kólemin anyqtaý úshin júrgiziledi», - delingen Ekologııa jáne tabıǵı resýrstar mınıstrligi málimetinde.
Qazirgi kezde zertteý jumystary bastaldy. Sý qoımasynyń túbinen synaq materıaldary alynyp, olar tıisti zerthanaǵa jiberildi.
«Aıta ketý kerek, mundaı jumystar bizdiń elimizde alǵash ret júrgizilip jatyr. Bul óz kezeginde ońtústik óńirlerdegi sý tapshylyǵyn joıý baǵytynda jańa serpin bolmaq», - dep atalyp ótken vedomstvo habarlamasynda.
