Shardara sý qoımasyndaǵy Arnasaı bógetin jańartý arqyly jylyna 1,2 mlrd. tekshe metr sý berýge bolady - QR AShM

ASTANA. QazAqparat - Shardara sý qoımasyndaǵy Arnasaı bógetin qaıta jańartýdy bastaý Ońtústik Qazaqstannyń aýyl sharýashylyǵy taýar óndirýshilerine tıimdi bolmaq, sebebi joba jyl saıyn 1,2 mlrd. tekshe metr qosymsha sý beredi, dep habarlady QR AShM Sý resýrstary komıtetiniń baspasóz qyzmetinen.

«OQO Shardara aýdanyndaǵy Shardara sý qoımasynyń Arnasaı bógetinde gıdrotehnıkalyq qurylystardyń keshenin qaıta jańartý» jobasy bastalǵan. Ol qashyqtyǵy 30 shaqyrym eki aýdan arasyndaǵy qatynas úshin joldy salýmen sý qoımasynyń ózen arnasynda úıindi dambasynyń qurylysyn qamtamasyz etýdi josparlaıdy.

«Búgingi kúni Joba barlyq memlekettik organdardan, sonyń ishinde «KazMIIR» ǴI, «KazDORNII» AQ men QR Ulttyq qaýipsizdik komıtetiniń Shekaralyq qyzmetinen kelisim aldy jáne Qazaqstan Respýblıkasynda qoldanystaǵy memlekettik normatıvterdiń barlyq talaptaryna sáıkes keledi», delingen atalǵan komıtet taratqan aqparatta. Arnasaı bógetin salý Ońtústik Qazaqstan oblysynyń eki aýdany - Maqtaral jáne Shardaranyń áleýmettik-ekonomıkalyq jaǵdaılaryn jaqsartady. Sonymen, Shardara sý qoımasynyń Arnasaı bógetin qaıta jańartý jobasy aıasynda tolyq jobalyq qýatymen sý qoımasy jumysyn esepke alyp, Shardara gıdroelektrstantsııasynan elektrenergııasyn óndirýdi ulǵaıtý múmkindigi týyndady. Shardara sý qoımasynyń jobalyq qýaty - 5,2 mlrd. tekshe metr. Sondaı-aq, Arnasaı bógetin qaıta jańartý jobasynyń aıasynda salynatyn jol Ońtústik Qazaqstan oblysynyń eki aýdanynda turǵyndar arasynda qatynas jolyn edáýir qysqartady. Sonymen qatar, Shardara sý qoımasynyń jumysy tolyq jobalyq qýatymen aýyl sharýashylyǵy jer-sýlaryn sýarý úshin sýdy saqtaý jáne tasqyn sýdyń qaýipsizdigin qamtamasyz etýge arnalǵan Kóksaraı kontrrettegishiniń jumysyna oń áserin beredi.