Shardara sý qoımasy jóndeýden ótken soń 7 baldyq jer silkinisine shydas bere alady
Bul týraly jýrnalısterge arnalǵan press-týr barysynda sý qoımasynda seısmıkalyq turaqtylyqty nyǵaıtý boıynsha jóndeý jumystaryn júrgizip jatqan qurylys kompanııasynyń ýchaske basshysy Ǵalym Myrzabaev málimdedi.
Onyń aıtýynsha, 1967 jyly «Shardara» sý qoımasy eń kóp degende alty baldyq jer silkinisine tótep beretindeı qýattylyqpen salynǵan. Alaıda, Ekologııa, geologııa jáne tabıǵı resýrstar mınıstrliginiń Sý resýrstary komıtetine qarasty «Qazsýshar» RMK saqtyq sharalaryn kúsheıtý úshin qumnan kóterilgen qabyrǵalardy qalyńdatyp, jer asty sýlarynyń deńgeıin tómendetý úshin «Shardara» sý qoımasyn qaıta jańǵyrtý jumystaryn qolǵa alǵan.
«1 mln 100 myń tekshe metr qum tóseledi. Osylaısha nysan qabyrǵasynyń artqy jaǵyn tolyǵymen nyǵaıtatyn bolamyz. Jer silkinisi bola qalsa, sý astyndaǵy tektonıkalyq plıtalar oınaýy múmkin. Sonda sýdyń betinde alyp tolqyndar paıda bolady. Bul - jumystardyń barlyǵy sonyń aldyn alý sharasy. Arnaıy burǵylanǵan tesikterdiń sanyn kóbeıtip jatyrmyz. Ol jer asty sýlarynyń deńgeıin tómendetedi,- deıdi Ǵalym Myrzabaev.
Al, Qapshaǵaı sý qoımasy «Shardara» sý qoımasy óndiristik bólimshesiniń basshysy Abaı Mútálıevtiń sózinshe, ótken jyly sý nysanynyń qabyrǵalaryn nyǵaıtýǵa respýblıkalyq bıýdjetten 7 mlrd 733 mln teńge qarajat bólingen. Osylaısha 56 jyl buryn salynǵan sý qoımasyn kezeń-kezeńimen jańǵyrtý jumystary qarqyndy júzege asyrylýda. Sý qoımasynyń qurylysy 2021 jyldyń aıaǵynda tolyǵymen aıaqtalady dep josparlanyp otyr. Qazirgi tańda jańǵyrtý jumystarynyń shamamen 33 protsenti aıaqtalyp, qurylys josparǵa sáıkes júrgizilip jatyr.
Osy ýaqytqa deıin Shardara sý qoımasyndaǵy uńǵyma sany 183 bolatyn. Qazir ol 600-ge deıin kóbeıtildi.
Aıta keteıik, Shardara sý qoımasynyń jalpy syıymdylyǵy - 5 mlrd 200 mln tekshe metr. Qazir sý nysanynda 792 mln tekshe metr sý bar. Osynyń nátıjesinde Shardara aýdany men Qyzylorda oblysynyń biraz bóliginde vegıtatsııalyq kezeń sátti ótken. Egin-terim naýqany kezinde Shardara aýdany men Qyzylorda oblysyna 7 mlrd tekshe metr sý berilgen.
Aldaǵy ýaqytta «Shardara» sý qoımasyna sandyq tehnologııalardy engizýdi de josparlap otyr. Qurylys jumystary aıaqtalǵannan keıin sý bólý jáne ony esepteý jumystary tolyǵymen avtomattandyrylmaq.
«Bul jerdiń barlyǵyna elektrondy esepteýish quraldary qoıylady. Bógetten shyǵyp jatqan sýlardyń barlyǵy kompıýter arqyly eseptelip otyrady. Ony bizdiń mamandar baqylap otyrady. Al, buryn gıdrotehnıkterimiz platınanyń barlyǵyn aralap, sýdyń deńgeıin qolmen ólsheıtin»,- deıdi Shardara sý qoımasy óndiristik bólimshesiniń basshysy Abaı Mútálıev.
