Shardara sý qoımasynda sýdy esepteý júıesi jańǵyrtyldy
ASTANA. KAZINFORM — Shardara sý qoımasynda sý kólemin dál ári jedel baqylaý úshin 11 arnaıy datchık ornatyldy. Jańa júıe sý esebin avtomattandyryp, ony tıimdi basqarýǵa múmkindik beredi. Bul týraly Sý resýrstary jáne ırrıgatsııa mınıstrligi málim etti
Vedomstvo Eýrazııalyq damý bankimen (EADB) jáne Qazaqstandaǵy BUU Damý baǵdarlamasymen birlesip, Shardara sý qoımasyndaǵy sý esebin avtomattandyrý jobasyn júzege asyryp jatyr. Joba aıasynda derekterdi onlaın rejımde beretin 8 gıdrotehnıkalyq nysanǵa sý deńgeıi men sý shyǵynyn ólsheıtin 11 datchık ornatý kózdelgen.
Bul sýdy dálirek esepke alýǵa jáne qolmen ólsheý qajettiligin joıýǵa múmkindik beredi. Búginde montajdaý jumystary tolyq aıaqtaldy. Shardara kópirine úsh sý esepteý quraly, «Shardara-Jetisaı» kópirine eki quraldan ornatyldy. Sonymen qatar Shardara magıstraldyq kanalyna, «Táýelsizdiktiń 20 jyly» kanalyna, Arys ózenindegi gıdrobeketke, Qyzylqum kanalyndaǵy kópirge, sondaı-aq Kóksaraı kontrrettegishiniń sý jetkizetin jáne sý buratyn kanaldaryndaǵy kópirlerge bir-birden qural ornatyldy.
— Shardara sý qoımasyndaǵy sý esebin avtomattandyrý EADB granttyq qarajaty esebinen júzege asyrylyp jatyr. Bul bastamany iske asyrý sý resýrstaryn ashyq ári tıimdi basqarýǵa berik tehnologııalyq negiz qalyptastyryp, tótenshe jaǵdaılardyń týyndaý táýekelderin azaıtady jáne elimizdiń sý sharýashylyǵy keshenin sapaly jańa deńgeıge kóteredi, — dedi Sý resýrstary jáne ırrıgatsııa vıtse-mınıstri Aslan Abdraımov.
Aıta keteıik, elimizdegi iri sý qoımalarynda 64,2 mlrd tekshe metr sý jınaldy.
