Shardara sý qoımasynda sý deńgeıiniń tómendeýinen qalada aýyz sý tapshylyǵy týyndady
TÚRKІSTAN. KAZINFORM - Shardarada aýyz sý tapshylyǵy týyndady. Bul jaǵdaı Shardara sý qoımasyndaǵy sýdyń shamadan tys azaıýynan qalyptasty. Qazirgi tańda máseleni sheshý maqsatynda jedel sharalar qolǵa alynyp jatyr.
Qala halqy sý qoımasynan keletin ashyq sý kózin paıdalanyp kelgen. Munda 85 kópqabatty turǵyn úıde 1687 páter bar, sondaı-aq 4833 jeke turǵyn úı ornalasqan. Jalpy 31 883 turǵynnyń táýliktik sý qajettiligi 10–12 myń tekshe metrdi quraıdy. Alaıda Shardara sý qoımasyndaǵy sý kóleminiń tómendeýine baılanysty búginde bul mólsher tolyq kólemde jetkizilmeı otyr.
Shardara aýdany ákimdiginiń málimetine súıensek, qalada 4 tamyzdan bastap balamaly sý kózderin paıdalaný jumystary bastalǵan. Bas sý torabynan 1,5 shaqyrym qashyqtyqtaǵy eki tereń uńǵymany burǵylaý júrip jatyr. Qazirgi tańda birinshi uńǵyma tolyq qazylyp bitken, endi shaıý jumystary atqarylýda. Bul kózderden táýligine 3120 tekshe metr sý alý josparlanyp otyr. Sý qoımaǵa panton ornatylyp, qýatty sorǵylar arqyly sý tartylyp jatyr.
Qala turǵyndaryn ýaqytsha aýyz sýmen qamtý úshin kópqabatty úılerdiń aýlalaryna 28 dana sý jınaý ydysy ornatyldy. Sý únemi tolyqtyrylyp otyrady. Bul úshin 10 sý tasymaldaýshy kólik jumyldyrylǵan. Árbir ydysqa jaýapty kezekshiler bekitilip, sýdyń deńgeıin baqylaý men ýaqtyly toltyrý qamtamasyz etiledi. Sý kózi retinde «Óteǵul» shaǵynaýdanyndaǵy uńǵyma paıdalanylyp jatyr.
Jekemenshik úsh uńǵyma jáne jeke vodovoz ıelerimen kelisim júrgizilip, halyqqa jetkiziletin sýdyń baǵasy turaqty deńgeıde saqtalýda. Qudyǵy bar úılerge de sý jetkizý jumystary uıymdastyrylǵan.
Oblys ákimi Nuralhan Kósherov te Shardara qalasyna issaparmen kelip, aýyz sýmen qamtý baǵytyndaǵy jumystardy tikeleı qadaǵalap júr. Búgin oblys ákimi Shardaradaǵy kópqabatty úılerdi aralap, turǵyndarmen kezdesti. Aýyz sý aǵymyn ulǵaıtý baǵytyndaǵy jumystardy túsindirdi.
– Bıyl sý máselesi ózekti bolyp tur. Jaǵdaı qatań baqylaýda. Arnaı shtab quryp, barlyq is-sharalardy atqarýdamyz. Sý kólemi artady, bári retteledi. Azamattar, mamandar úzdiksiz jumys istep jatyr, – degen Nuralhan Kósherov páterlerge kirip, sý qysymyn tekserdi.
«Shardara» sý qoımasynda sý kóleminiń azaıýyna baılanysty qalany jedel aýyz sýmen qamtamasyz etýdiń is-qımyl algorıtmi bekitilgen. Algorıtmge sáıkes aýyz sý táýekelderin basqarý boıynsha shtab qurylyp, jumys júrgizilip jatyr.
- Búginde qalanyń bas sý torabyn balamaly sý kózimen toltyrý úshin uńǵyma burǵylaý jumystary júrgizildi. 630 tekshe metr sý beretin qosymsha nasos ornatylyp, iske qosyldy. Aýyz sý máselesine qatysty jaýaptylar bekitilgen, jaǵdaı turaqty ári baqylaýda, - delingen oblas ákimdigi taratqan aqparatta.
Aıta keteıik, budan buryn Túrkistan oblysynda qýańshylyq saldarynan egistik kúıip, mal azyǵy qymbattaǵanyn jazǵan bolatynbyz.