Shardara sý qoımasyna 10 mlrd tekshe metr sý keledi - mınıstrlik
ASTANA. KAZINFORM – Ortalyq Azııa elderi 2026–2027 jyldardaǵy vegetatsııaaralyq kezeńde Shardara sý qoımasyna keletin sý kóleminiń boljamyn kelisti. Aldaǵy kezeńde sý qoımasyna shamamen 10 mlrd tekshe metr sý túsýi kútiledi, dep habarlaıdy Sý resýrstary jáne ırrıgatsııa mınıstrligi.
Túrikmenstannyń Túrikmenbashy qalasynda Ortalyq Azııa memleketteriniń Memleketaralyq sý sharýashylyǵyn úılestirý komıssııasynyń 95-otyrysy ótti.
Jıynǵa Qazaqstannyń Sý resýrstary jáne ırrıgatsııa mınıstri Nurjan Nurjigitov, Tájikstan Energetıka jáne sý resýrstary mınıstrliginiń Sý-energetıkalyq saıasat bas basqarmasynyń bastyǵy Daler Abdýhalok, Túrikmenstan Memlekettik sý sharýashylyǵy komıtetiniń tóraǵasy Dýrdy Gendjıev jáne Ózbekstannyń Sý sharýashylyǵy mınıstri Shavkat Hamraev qatysty.
Taraptar Syrdarııa jáne Ámýdarııa ózenderi basseınderindegi 2026 jylǵy vegetatsııa kezeńiniń qorytyndysyn shyǵaryp, 2026–2027 jyldardaǵy vegetatsııaaralyq kezeńge arnalǵan sý alý lımıtteri men sý qoımalarynyń jumys rejımderiniń boljamyn bekitti.
Mınıstrliktiń málimetinshe, bıyl Syrdarııa ózeni basseınindegi vegetatsııa kezeńi turaqty ótti. Túrkistan oblysyndaǵy Shardara sý qoımasyna shamamen 3,69 mlrd tekshe metr sý kelip túsken. Bul boljanǵan kólemnen 840 mln tekshe metrge artyq.
Al 2026–2027 jyldardaǵy vegetatsııaaralyq kezeńde sý qoımasyna keletin sý kólemi shamamen 10 mlrd tekshe metr bolady dep kútilip otyr.
Jıynda sý resýrstaryn esepke alý jáne monıtorıng júrgizý júıesin jetildirý máselesi de qaraldy. Taraptar Syrdarııa basseıninde sýdy esepke alýdyń avtomattandyrylǵan júıesin engizý josparynyń jobasyn ázirleıtin jumys tobynyń otyrysyn ótkizýge kelisti.
Sonymen qatar Halyqaralyq Araldy qutqarý qorynyń quryltaıshy memleketteri basshylarynyń sammıtterinde qabyldanǵan mindetterdiń oryndalý barysy talqylandy.
Budan keıin Ámýdarııa men Syrdarııa ózenderiniń sý resýrstaryn utymdy paıdalaný máseleleri boıynsha Ortalyq Azııa elderiniń joǵary deńgeıdegi kezdesýi uıymdastyryldy.
Oǵan Qazaqstan, Tájikstan, Túrikmenstan jáne Ózbekstan ókilderimen qatar, Qyrǵyzstannyń Túrikmenstandaǵy Tótenshe jáne ókiletti elshisi Azızbek Madmarov qatysty.
Kezdesýde transshekaralyq ózenderdiń sýyn tıimdi paıdalaný, óńirdegi sý tapshylyǵyna baılanysty syn-qaterler jáne memleketaralyq yntymaqtastyqty nyǵaıtý máseleleri sóz boldy.
Qatysýshylar sý resýrstaryn birlesip basqarý tetikterin jetildirýge jáne barlyq Ortalyq Azııa memleketiniń múddesin eskerýge erekshe nazar aýdardy.
– Ortalyq Azııa elderiniń sý sharýashylyǵy vedomstvolary arasyndaǵy ózara is-qımyl ótken vegetatsııa kezeńiniń turaqty ótýin qamtamasyz etýge múmkindik berdi. Búgin aldaǵy ýaqytta birlesken ári tıimdi jumys júrgizýge negiz qalandy. Biz jáne bizdiń seriktesterimiz barlyq taraptyń múddesin eskere otyryp, transshekaralyq sý resýrstaryn ádil bólýge baǵyt alyp otyrmyz, – dedi Sý resýrstary jáne ırrıgatsııa mınıstri Nurjan Nurjigitov.
Kezdesý qorytyndysynda taraptar sý resýrstaryn turaqty ári utymdy paıdalaný baǵytyndaǵy birlesken jumysty jalǵastyrýǵa daıyn ekenin rastady.
Memleketaralyq sý sharýashylyǵyn úılestirý komıssııasynyń kelesi, 96-otyrysyn 2027 jyldyń birinshi toqsanynda Ózbekstanda ótkizý josparlanyp otyr.
Aıta keteıik, 2025 jylǵy qarashada Ortalyq Azııa elderiniń sý sharýashylyǵy vedomstvolary Shardara sý qoımasyna 2025–2026 jyldardaǵy vegetatsııaaralyq kezeńde keletin sý kóleminiń boljamyn kelisken bolatyn.
