Kaspıı teńiziniń jaǵalaýynda 2 kún qatarynan 5 gektar qamys jandy

ATYRAÝ. KAZINFORM – Kaspıı teńiziniń Atyraý oblysyndaǵy jaǵalaýynda 2 kún qatarynan 5 gektar qamys órtendi.

Atyraý oblystyq Tótenshe jaǵdaılar departamentiniń ımıdjdik jumys jáne syrtqy kommýnıkatsııalar tobynyń aqparatyna qaraǵanda, teńiz jaǵasyndaǵy qamys órti 15 naýryzda tutanǵan.

– 15 naýryzda Atyraý qalasynyń mańyndaǵy Novokırpıchnyı aýylynan Kaspıı teńizine qaraı 30 shaqyrym qashyqtyqta shamamen 4 gektar aýmaqta qamys ósimdigi jandy. Atyraý oblystyq Tótenshe jaǵdaılar departamentiniń 30-dan astam qutqarýshysy órtengen qamysty sóndirýge jumyldy. Oǵan 5 tehnıka bólindi. Qutqarýshylar sapalaqtyń jáne motopompanyń kómegimen qamys órtin sóndirý jumysyn júrgizdi, - dep habarlady departamenttiń ımıdjdik jumys jáne syrtqy kommýnıkatsııalar toby.

Al keshe 16 naýryzda qamys órti taǵy qaıtalanǵan. Keshki saǵat 18:40-ta sol aýmaqta 1 gektar aýmaqta qamys órtendi.

– Qamys órti qutqarýshylardyń kúshimen tolyqtaı joıyldy. Tótenshe jaǵdaılar departamentiniń kezekshi qyzmeti teńiz jaǵalaýyn baqylaýǵa aldy, - dep málim etti departamenttiń ımıdjdik jumys jáne syrtqy kommýnıkatsııalar tobynan.

Eske sala ketelik, buǵan deıin Atyraýda páterdegi órttiń tútininen ýlanǵan zeınetker kóz jumǵanyn jazǵan bolatynbyz.