Shardara sý qoımasy 90 paıyz toldy

TÚRKІSTAN. KAZINFORM – Óńirde jalpy 20 ózen, 42 sý qoıma bar.

Túrkistan oblysy Tótenshe jaǵdaılar departamenti mamandarynyń sózine súıensek, búginde kóktemgi sý tasqyny boıynsha óńirdegi jaǵdaı turaqty. Aldyn alý sharalary da júrgizilip keledi.

Departamentte táýliktik kezekshilik shtaby uıymdastyrylǵan. Sý sharýashylyǵy nysandary turaqty túrde monıtorıngten ótip jatyr.

- Sý qoımalardyń tolýy – 43 paıyz. Taýly aýdandarda 2-4 sm aralyǵynda toń qatý baıqaldy. Bul ótken jylmen salystyrǵanda 2 ese az. Naýryz aıynda aýa temperatýrasy joǵary, ıaǵnı túnde 3+6, kúndiz 15+25 0S deıin jyly bolatyny kórsetilgen. Syrdarııa ózeniniń jaǵdaıy turaqty baqylaýda. Shardara sý qoımasynyń tolýy – 90 paıyz nemese 4 669 mln tekshe metr. Sý qoımaǵa sekýndyna 734 tekshe metr sý qabyldanyp, 565 tekshe metr Syrdarııaǵa tastalyp jatyr, - delingen Túrkistan oblysy TJD baspasóz qyzmetiniń aqparatynda.

Búginde óńirdegi qashyrtqy arnalar men aryqtar, jol boıyndaǵy sý ótkelderi mehanıkalyq tazalaýdan ótken. Inertti materıaldar da daıyn. Kóktemgi sý tasqyny kezinde tótenshe jaǵdaılardyń aldyn alý maqsatynda jalpy 1064 jeke quram, 124 tehnıka, 11 qaıyq pen 92 motopompa daıyndyqqa keltirilgen.

Aıta keteıik, budan buryn segiz oblysta tasqyn qaýpi joǵary ekendigin jazǵan bolatynbyz.