Shardara sý-elektr stantsııasynyń ónimdilik qýaty artty
NUR-SULTAN. QazAqparat - Túrkistan oblysyndaǵy Shardara sý-elektr stantsııasyna jańǵyrtý jumystary júrgizilip, ónim qýattylyǵy 26 paıyzǵa artty. Bul týraly «Shardara sý-elektr stantsııasy» AQ bas ınjeneriniń orynbasary Nurlan Amanov málimdedi, dep habarlaıdy QazAqparat.
Jóndeý jumystaryna deıin 100 mVT elektr energııasyn óndirip kelse, qazir óndiris kólemi 126 mVt-qa jetken. Nátıjesinde óńirdi toq kúshimen qamtý deńgeıi 14 paıyzǵa ósken. Jańǵyrtý jumystaryna deıin bul kórsetkish nebári 8 paıyzdy quraǵan.
Onyń sózinshe, jańǵyrtý jumystary barysynda stantsııadaǵy tórt birdeı generator nemistiń zamanaýı qondyrǵylarymen almastyrylǵan.
«Jarty ǵasyrǵa jýyq tarıhy bar keshendegi eskirgen qondyrǵylar elimizdegi ındýstrııalandyrý kartasy aıasynda tolyqtaı jańasyna almastyryldy. Nátıjesinde ónim kólemi artyp, qoımadaǵy sý da bosqa aqpaıtyn jaǵdaıǵa jetti. Tıisinshe oblys kólemindegi óndiriske qajetti joǵary kerneýli jelidegi toqtyń kúshin turaqty ustap turýǵa múmkindik týdy», – dedi N.Amanov.
Mamandar jumys kamerasynyń bári shirimeıtin temirden salynǵanyn aıtady. Buǵan deıin jumys kameralary shoıynnan bolǵan. Jobanyń jalpy quny – 75 mıllıon eýro.
«Bir sózben aıtqanda, burynǵy qolmen ajyratylyp qosylatyn qondyrǵylar kompıýtermen basqarylady. «ARÝ» degen maı qosatyn qondyrǵylar bar. Solarǵa baryp, adam kúshin qoldanyp, qolmen qosatynbyz. Al qazirgi ýaqytta kompıýterdiń kómegimen bir jerde otyryp, basqaratyn boldyq. Jańǵyrtý jumystary barysynda qurylǵylarmen qatar stantsııanyń ishindegi toq júretin jeliler men basqarý qondyrǵylary tolyqtaı jańartyldy», – deıdi «Shardara sý-elektr stantsııasy» AQ bas ınjeneriniń orynbasary.
Aıta keteıik, stantsııa salynǵaly jalpy kólemi 21 mrd. 460 mln. kVt-tan asa qýat óndirgen. Stantsııada jańǵyrtý jumystaryna deıin 150-den astam adam jumys istep kelse, qazir 136 qyzmetker eńbek etýde.
