Shardara oqıǵasy: Ákesine qorlyq kórsetken uldyń áıeline qatysty qylmystyq is qozǵaldy
TÚRKІSTAN. KAZINFORM — Áıelge qatysty sotqa deıingi tergeý bastaldy.
Túrkistan oblysy polıtsııa departamentiniń málimetinshe, Shardara aýdanynda qart kisiniń qaza tabýyna baılanysty birneshe baǵytta tergeý júrgizilip jatyr. Buǵan deıin Qylmystyq kodekstiń «Jábirlenýshiniń ólimine ákep soqqan qasaqana aýyr dene jaraqatyn keltirý» baby boıynsha is qozǵalyp, kúdikti ustalyp, ýaqytsha ustaý ızolıatoryna qamalǵan bolatyn. Qazirgi tańda ol sot sanktsııasymen qamaýda otyr.
— Sonymen qatar áıel adamǵa qatysty Qylmystyq kodekstiń «Top bolyp jasalǵan uryp-soǵý» baby boıynsha sotqa deıingi tergeý bastaldy. Qazirgi tańda bolǵan oqıǵanyń barlyq mán-jaıyn anyqtaý úshin tergeý júrgizilip jatyr. Onyń nátıjesi boıynsha barlyq qatysýshynyń áreketterine quqyqtyq baǵa berilip, tıisti protsessýaldyq sheshim qabyldanady, — delingen vedomstvo aqparatynda.
Sonymen qatar, polıtsııa departamentiniń baspasóz qyzmeti buǵan deıin jábirlenýshiden nemese ózge azamattardan zorlyq-zombylyq derekteri týraly shaǵym túspegenin málimdedi.
Qylmystyq-protsestik kodeksiniń 201-babyna sáıkes, tergeý múddesine baılanysty ózge aqparat jarııa etilmeıdi.
Aıta keteıik, budan buryn Túrkistan oblysynda ákesin uryp, qorlyq kórsetken turǵyn qamaýǵa alynǵanyn jazǵan bolatynbyz.
