Shardara men Kóksaraı sý qoımalary áli kóp mólsherde sý qabyldaı alady - maman
QYZYLORDA. QazAqparat - Ońtústik óńirlerdiń ózenderinde mol sýdyń qaýpi týraly aqparat taraǵannan keıin «QazAqparat» tilshisi Aral-Syrdarııa basseındik ınspektsııasynan mán-jaıdy bilip qaıtqan edi.
Inspektsııa basshysynyń orynbasary Jumahan Nurseıitovtiń aıtýyna qaraǵanda, darııadaǵy jaǵdaı qalypty. «Búgingi tańda Syrdarııaǵa keler sýdyń bas qoımasy sanalatyn qyrǵyz elindegi Toqtaǵulda 16 mlrd 430 mln tekshe metr sý qory bar. Odan tómen qaraı sekýndyna 789 tekshe metr sý bosatylýda. Ózimizdegi Shardara sý qoımasyna 2 mlrd 359 mln tekshe metr sý jınaldy. Al Kóksaraı sý rettegishi 1 mlrd 287 mln tekshe metr sý qabyldap úlgerdi», - dedi J. Nurseıitov.
Onyń aıtýynsha, Shardara men Kóksaraı sý rettegishteriniń áli kóp mólsherde sý qabyldaý múmkindigi bar.
«Sondyqtan, qazirgi tańda Qyzylorda sý torabynan sekýndyna 445 tekshe metr sýdyń ótip jatqany qaýip týdyrmaıdy», - dep atap ótti Jumahan Nurseıitov.
Bul kúnderi Qyzylorda qalasy tusyndaǵy Syrdarııa ózenindegi muz qalyńdyǵy 15 santımetr bolsa, sýyq bolyp sanalatyn Qazaly aýdany mańynda muz qalyńdyǵy 45 santımetrge jetken. Ótip jatqan sý mólsheri asa kóp emes.
