«Shardara», «Kóksaraı» sý qoımalarynda jaǵdaı kúrdeli - TJM

ASTANA. QazAqparat – QR Tótenshe jaǵdaılar mınıstri ıÝrıı Ilın jyl basynan beri Shardara sý qoımasy men Kóksaraı sý rettegishinde kúrdeli jaǵdaı qalyptasqanyn aıtty, dep habarlaıdy QazAqparat tilshisi.

«Búgingi tańda Shardara sý qoımasynyń sýǵa tolýy – 5,1 mlrd m3 nemese 98% quraıdy. Kóksaraı sý rettegishinde – 1,8 mlrd m3 nemese 98%. Bul rette Sý resýrstary komıtetiniń tapsyrysymen «Qazgıprovodhoz» ınstıtýty tekserý júrgizip, onyń tehnıkalyq jaı-kúıi týraly qorytyndy berdi, oǵan sáıkes jınaqtaý 1,8 mlrd m3 sýdan aspaýy tıis. Bul týraly biz Ekologııa jáne tabıǵı resýrstar mınıstrligine birneshe ret habarladyq», - dedi mınıstr Úkimettiń búgingi otyrysynda.

Yqtımal sý tasqyny jaǵdaıy Shardara sý qoımasynan jáne Kóksaraı sý rettegishinen kóp mólsherde sý aǵyzǵan jaǵdaıda Túrkistan jáne Qyzylorda oblystary aýmaqtaryn sý basý qaýpimen kúrdelene túsedi.

«Qyzylorda oblysynyń soltústik aýdandaryndaǵy muz qatýdy Sý resýrstary jónindegi komıtet sý shyǵyny tómen kezde belgilegen, ol sý tógindilerin qaýipsiz arttyrýǵa múmkindik bermegendikten, jaǵdaı qıyndap barady. Ekologııa jáne tabıǵı resýrstar mınıstrligi Shardara sý qoımasy men Kóksaraı sý rettegishinde sýdyń jınaqtalý barysyn baqylaý úshin vedomstvoaralyq jumys tobyn qurý jónindegi bizdiń usynystarymyzdy esepke alǵan joq», - dedi Tótenshe jaǵdaılar mınıstri.

Óz kezeginde QR Ekologııa jáne tabıǵı resýrstar mınıstri Zúlfııa Súleımenova Shardara sý qoımasy men Kóksaraı sýrettegishi aınalasyndaǵy jaǵdaı únemi baqylaýda ekenin aıtty.

Aıta keteıik, bıyl sý tasqyny qardyń kóp bolýyna jáne topyraq qabatynyń qatty tońazýyna baılanysty aýqymdy bolatyn túri bar. Sý basý aımaǵynda 255 eldi meken bolýy múmkin, bul 127 myńnan astam úı jáne 700 myńnan astam azamat.

Tótenshe jaǵdaılar mınıstri ıÝrıı Ilınniń aıtýynsha, óńirler iri qalalardyń qaryn shyǵarady, aýyldar nazardan tys qalýda.