Shardara qalasyndaǵy «Qazposhta» bólimshesin tonaǵandar 11 jylǵa sottaldy - OQO
ASTANA. QazAqparat - Ońtústik Qazaqstan oblysynda Shardara qalasyndaǵy «Qazposhta» bólimshesin tonaǵandar 11 jylǵa bas bostandyǵynan aıyryldy. Búgin atalǵan is boıynsha Qylmystyq ister jónindegi mamandandyrylǵan aýdanaralyq sot Shardara qalasynyń úsh turǵyny - Áset Batyrshaev, Asqar Batyrshaev jáne Dáýren Nurylaevqa úkim shyǵardy. Olardyń árqaısysy 11 jylǵa bas bostandyǵynan aıyrylyp, jazasyn qatań rejımdegi kolonııada óteıtin boldy.
Qylmystyq oqıǵa 2015 jylǵy tamyz aıynyń ortasynda oryn aldy. «Sottalýshy Áset Batyrshaev óz ákesiniń zeınetaqysyn alý úshin kezekte turǵan bolatyn. Osy kezde adamdar kezegi uzaqqa sozylyp, áńgime barysynda bireýler aýyl turǵyndary úshin 80 mln teńge shamasynda sýbsıdııanyń poshtaǵa ákelingenin aıtyp qalady. Osyny qulaǵy shalǵan sottalýshy aýylǵa baryp, dosy men baýyryna «Qazposhtany» tonaý týraly usynys aıtqan», - deıdi sýdıa Dáýren Madalıev.
Qylmyskerler tonaýdy tııanaqty josparlaıdy. Betperde, qolǵap, atys qarýy bolyp tabylatyn sholaq myltyq pen tapansha daıyndaǵan. Osylaısha, aǵaıyndylardyń kóligine mingen olar poshta mekemesine keledi. Onda kúzetshini qarýmen qorqytyp, onyń aýzyn skotchpen baılap, aqsha saqtalǵan bólmege kiredi. Onda ınkassatorlyq sómkelerdi ózderiniń qaptaryna sala bastaǵanda, dabyl oınaı jónelgen.
«Olar tipti sómkelerde ne bar ekenin aldyn ala qaramaǵan, birden ınkassatorlyq sómkelerdi ózderiniń qaptaryna sala bastaǵan. Onda tipti temir monetalar boldy. Nátıjesinde tek shamamen 530 myń teńgeni úpteýge shamalary keldi. Tonaý shamamen saǵat tańǵy 4-terde bolsa, saǵat 7-de qylmyskerler quryqtaldy», - dedi Dáýren Madalıev.
Qylmyskerler mingen kólikten barlyq zattaı aıǵaqtar, aqsha, qarý men betperdeler tabylǵan. Sotta olardyń kinási tolyǵymen dáleldenip, olar QR Qylmystyq kodeksiniń 192 baby, 4 tarmaǵy, 2 tarmaqshasy jáne 287 baptyń 4 tarmaǵy boıynsha aıyptalǵan.
