Shardara qalasynyń barlyq shaǵynaýdandaryna sý berildi
TÚRKІSTAN. KAZINFORM – Shardara sý qoımasyndaǵy sý deńgeıiniń ýaqytsha tómendeýine baılanysty, 6 tamyz kúni Shardara qalasynda sý berý boıynsha másele týyndady. Osyǵan oraı Túrkistan oblysynyń ákimi Nuralhan Kósherovtiń tapsyrmasymen jedel shtab qurylyp, naqty is-qımyl algorıtmi bekitildi, táýlik boıy kezekshilik uıymdastyrylyp, turǵyndar úshin jedel jeli iske qosyldy.
Shtabtyń úılesimdi ári jedel jumysynyń nátıjesinde sý berý qysqa ýaqyt ishinde qalpyna keltirildi. Áleýmettik mańyzy bar nysandarǵa, sonyń ishinde aýrýhanalar men kópqabatty turǵyn úılerge sý aldymen jetkizildi.
Sý qysymynyń tómendigi men jetkizý kóleminiń jetkiliksizdigin joıý maqsatynda birinshi negizgi sý torabyna qosymsha sorǵy ornatylyp, dıametri 200 mm bolatyn polıetılen qubyry iske qosyldy. 6 tamyz kúni saǵat 20:50-de ekinshi sorǵy sátti qosylyp, ol arqyly Shardara sý qoımasynan qalanyń negizgi sý torabyna sý jetkizý júzege asyrylyp jatyr.
Búgingi kúni Shardara qalasynyń barlyq shaǵynaýdanynda sý berý tolyq qalpyna keltirildi. Aldyn alý jáne turǵyn úılerge sýdyń úzdiksiz berilýin qamtamasyz etý maqsatynda qosymsha 28 sý jınaý rezervýary ornatyldy. Sonymen qatar táýlik boıy 10 arnaıy sý tasymaldaıtyn kólik jumys isteýde.
Sondaı-aq 3 uńǵyma ıesine jáne sý tasymaldaıtyn 15 kólik ıesine aýyz sý baǵasyn kótermeý týraly túsindirý jumystary júrgizilip, tıisti kelisimder jasaldy. Sý tasymaldaý jumystary táýlik boıy jalǵasyp jatyr.
– Búginde qalanyń barlyq turǵyn aýdanyna sý berilýde. Halyqty sýmen qamtýdy oblys ákimdigi ókilderi, aýdan basshylyǵy jáne kommýnaldyq qyzmet mamandary úılestirip otyr. Táýlik boıy kezekshilik uıymdastyrylyp, jumys turaqty túrde júrgizilýde, - dedi Túrkistan oblysy ákiminiń birinshi orynbasary Zulpyhar Joldasov.