Shardara aýrýhanasy kompıýterlik tomografııa apparatymen jabdyqtaldy
ShARDARA.QazAqparat – Túrkistan oblysy Shardara aýdandyq ortalyq aýrýhanasynyń ınsýlt bólimshesi kompıýterlik tomografııa apparatymen jabdyqtaldy. Zamanaýı úlgidegi qondyrǵy ornatylǵan kabınetti oblystyq qoǵamdyq densaýlyq saqtaý basqarmasynyń basshysy Muqan Egizbaev arnaıy baryp ashty, dep habarlaıdy QazAqparat tilshisi.
Aýdan halqyna endi zamanaýı sáýleli zertteýden ótý úshin burynǵydaı alys jolǵa shyǵýdyń qajeti bolmaıdy. Óıtkeni Japonııada shyǵarylǵan joǵary sapaly kompıýterlik tomografııa júıeleri naqty jáne sapaly medıtsınalyq tekserýden ótkizedi.
Aýrýhanada dárigerler biliktiligin úzdiksiz kóterýdiń arqasynda ınsýlt bólimshesi ashylyp, Qazaqstanda jáne shetelde bilimin jetildirgen mamandarmen tolyq qamtyldy. Emdeý mekemesiniń orta býyn medıtsına qyzmetkerleri de Túrkistan joǵary medıtsına kolledjinde bilimin shyńdaǵan. Búginde ońtaıly ózgeristeri kóp aýrýhanada budan bólek ońaltý ortalyǵy jumys istep tur.
Sondaı-aq, mehanıka-terapııalyq apparattarmen, emdik dene shynyqtyrý, massajdyń dástúrli jáne ınnovatsııalyq tehnologııalary boıynsha túrli jattyqtyrý quraldarymen jabdyqtalǵan.
Osyndaı júıeli jumystyń arqasynda ortalyqqa kelip, emdelýshiler sany kún sanap artýda.
