Shardara aýdanynyń qurylǵanyna 55 jyl tolýyna oraı merekelik shara ótti
ShARDARA. QazAqparat – Túrkistan oblysy, Shardara aýdanynyń resmı túrde qurylǵanyna 55 jyl tolýyna oraı merekelik shara ótti. Búgin sondaı-aq, aýdan ortalyǵynyń Shardara qalasyna kóshirilgenine 50 jyl tolǵan mereıli datalardy aýdan jurtshylyǵy joǵary deńgeıde atap ótti, dep habarlaıdy QazAqparat tilshisi.
Saltanatty sharaǵa kelgen qonaqtar aldymen Abaı alańyndaǵy «Shejire» aýylyn jáne retrokólikter men tarıhı jádiger buıymdar kórmesin tamashalady. Mereıtoı qurmetine «Altyn kúz» jármeńkesi» uıymdastyrylyp, aýyl sharýashylyǵy salasynda lızıng boıynsha alynǵan jańa tehnıkalar kórmesi qoıyldy. Aýyl sharýashylyǵy ónimderi arzan baǵada saýdaǵa shyǵaryldy. Qala men aýyldardan jınalǵan ári birdeı ulttyq úlgide kıingen 55 kelin merekege kelgen el aǵalaryna birdeı ıilip sálem salyp, izet kórsetti. Qala berdi keli túıip, urshyq ıirip jatty. Al, mektep oqýshylary Abaı alańynda fleshmob uıymdastyryp, Shardara tarıhynan syr shertetin sýret kórmesi qoıyldy. Aýdandyq mádenıet saraıynda toıǵa jınalǵan qaýymdy Túrkistan oblysy ákiminiń orynbasary Meıirjan Myrzalıev quttyqtap, aýdan turǵyndaryna oblys ákimi Ómirzaq Shókeevtiń quttyqtaý hatyn oqyp berdi. Aýdan ákimi Qaırat Joldybaı da Shardaranyń ósip-órkendeýine, áleýmettik-ekonomıkalyq damýyna súbeli úlesterin qosqan eńbek ardagerlerine syı-sııapat jasady. Birqatar azamattardy merekelik medalmen marapattady.
Aıtýly sharada shardaralyqtardy memleket jáne qoǵam qaıratkeri Zaýytbek Turysbekov quttyqtap, júrekjardy tilegin bildirdi. Jıynda «Qurmet» jáne «Parasat» ordenderiniń ıesi, «Qazaq úni» gazetiniń bas redaktory Qazybek Isa QR Parlamenti Májilisiniń depýtaty, «Aq jol» partııasynyń tóraǵasy Azat Perýashevtiń quttyqtaýyn jetkizip, óziniń Shardaraǵa arnaǵan óleńin oqyp berdi. Merekelik keshte elimizdiń óner juldyzdary Dosymjan Tańatarov pen Senbek Jumaǵalıev, Jalǵas Keńesov pen Mádına Sádýaqasova án shyrqap, tyńdarmandarǵa kóterińki kóńil-kúı syılady.
