Shardara aýdanynyń ákimi aýyl turǵyndarymen kezdesti – Túrkistan oblysy
Aýdan basshysy sondaı-aq, Jaýshyqum, Q.Turysbekov, Alataý batyr, Uzyn ata aýyldaryn da kórip, ondaǵy máselelermen tanys boldy. Qosseıit jáne Kóksý aýyldarynyń turǵyndarymen de kezdesip, sheshimin tappaı otyrǵan problemalaryn tyńdady. Ákimmen kezdesken jergilikti halyq birinshi kezekte maqta baǵasynyń tómendigin kóldeneń tartsa, odan keıingi kezekte aýyz sý men aǵyn sý, gazdandyrý máselelerin kóterdi. Osy mazmundaǵy máseleler aýdan prokýrory Rýslan Ábdiraıymovtyń qatysýymen ótken Sútkent aýylyndaǵy kezdesýde de kóterildi. Árbir turǵyndy muqııat tyńdap, olardyń aıtqan talap-tilekteri boıynsha Qaırat Joldybaı bul sharýalardyń oń sheshilýi úshin tıisti jumystar júrgiziletinin atap ótti. «Aýyl aralaýdaǵy basty maqsat – kúzgi jıyn-terim naýqanynyń barysymen jáne aýyldardaǵy kásipkerlik nysandardyń jaı-kúıimen tanysyp, týyndaǵan máselelerdiń ońtaıly sheshilý joldaryn tabý. Sondyqtan da turǵyndardy tolǵandyryp júrgen problemalardy sheshýge jáne aıaqsyz qaldyrmaýǵa tyrysamyz», - dedi Qaırat Joldybaı. Aýdan ákiminiń aıryqsha nazar aýdarǵan máselesiniń biri – aýyldarda júzege asyrylyp jatqan 29 jobanyń oryndalý barysy boldy. Atap aıtqanda, Túrkistan oblysynda agroónerkásip keshenin damytý boıynsha oblys ákimi janynan jobalyq basqarý keńsesi qurylǵan bolatyn. Agroónerkásip keshenin damytý baǵytynda aýdanda 29 joba jasalynyp, oblysta qoldaý tapqan. Bul jobalardyń basym bóligi mal sharýashylyǵyn damytý, qus jáne balyq ósirý, bir jylda egistik alqaptan eki ret ónim alý baǵytyndaǵy jumystar. Jobalardyń deni qazirgi tańda óz jumystaryn bastap ta ketti. Aýdan ákimi atalǵan kásipkerlik nysandardyń jumystaryn aralap kórip, sharýalarmen tildesti. Aýdan basshysymen birge shyqqan túrli salanyń basshylary da turǵyndar tarapynan qoıylǵan saýaldarǵa jaýaptar berdi.
