Shardara aýdanyndaǵy eldi mekenderge gaz ben aýyz sý berildi
ShARDARA. QazAqparat – Túrkistan oblysy, Shardara aýdanynda tórt aýylǵa kógildir otyn, úsh eldi mekenge aýyz sý berildi.
Saltanatty sharaǵa aýdan basshylyǵy qatysyp, aýyl turǵyndarynyń qýanyshymen bólisti, dep habarlaıdy QazAqparat tilshisi.
Bul kúni aýdannyń Munaı baza, №14 Beket jáne Aqberdi eldi mekenderinde turatyn 1600-den asa turǵyn taza aýyz sýǵa qol jetkizdi. Aýdan ákimdiginiń tapsyrysymen josparlanǵan qurylys jumystary aıaqtalyp, úsh eldi mekendegi 284 úıge sý taratyla bastady. Saltanatty sharaǵa qatysqan aýdan ákimi Qaırat Joldybaı jergilikti halyqty búgingi merekemen quttyqtap ótti.
«Aǵymdaǵy jyly aýdandaǵy 25 eldi mekenniń 18-i, ıaǵnı 13442 otbasy nemese 76,83 myń adam ortalyqtandyrylǵan qubyr sýymen qamtyldy. Sondaı-aq, kelesi jylǵa Shardara qalalyq bas sý torabyn qaıta qurý jáne Qyzylqum aýylynyń sý torabyn ortalyqtandyrý boıynsha jumys júrgizý josparlanýda»,-dedi Qaırat Joldybaı.
Bul kúni sondaı-aq, Aqaltyn, Sútkent, Qyzylqum jáne Dostyq aýyldary kógildir otynǵa qosyldy. Kóp jyldardan beri gazǵa qol jetkize almaı kele jatqan turǵyndardyń qýanyshyna aýdan ákiminiń orynbasary Baýyrjan Shompıev ta ortaqtasyp, osy baǵytta atqarylyp jatqan jumystar barysyn baıandady.
«Táýelsizdik kúni qos qýanyshqa kenelip otyrsyzdar. Aýdanymyzda atqarylyp jatqan barlyq jumystar tynyshtyǵymyzdyń, osy aýdan halqynyń birliginiń arqasy dep bilemin»-dedi Baýyrjan Shompıev.
Aıta ketsek, búgingi kúni aýdan aýmaǵyndaǵy 25 eldi mekenniń 7-i kógildir otynmen qamtylǵan. Keler jyly taǵy 4 eldimekenge gaz berilip, odan keıin 5 aýylǵa qubyrlar tartý jumystary josparlanýda.
