Shardara aýdanyndaǵy atys neden bastaldy

Aýyl turǵyndarynyń sózinshe, Dostyqtaǵy jigitter qaýyn artýǵa jaldanyp jumys isteıdi. Sol kúni olardyń arasynda Shymkentten kelgen jigit bolǵan. Ol aýyldyń jigitterine kúsh kórsetpek bolǵanǵa uqsaıdy. Sóıtip sol jerde janjaldasyp qalǵan. Keıinnen shymkenttik jigit ketip qalyp, bir saǵattan soń qaıta oralǵan. Tek jalǵyz emes, birneshe kólikpen kelgen. Kele salysymen aýyl jigitterine oq jaýdyrady. Saldarynan oq tıgen bir jigit mert bolyp, taǵy ekeýi jaraqat alǵan. Al, qaıtys bolǵan 22 jastaǵy jigit bıyl ǵana joǵary oqý ornyn támamdap, fızıka-ınformatıka pániniń muǵalimi bolyp mektepke jumysqa ornalasyp jatqan eken. 

«Ol jigit mektepte jumys isteýi kerek bolatyn. Qyrkúıek bastalǵansha ýaqytsha jaldanyp, jumys istep júrgen. Bizdiń oıymyzsha, oq ol jigitke qasaqana atylǵan joq, kezdeısoq tıgen», - deıdi Dostyq aýylynyń bıi Jora Amanov.

Dostyq aýylynyń turǵyndary muzdaı qarýlanǵandardyń qolynda tapansha, besatar, qosaýyz bolǵan dep otyr. Olar 5 kólikpen kelip, aıdalada jumys istep júrgen jigitterdi atqan. Qazir jaralanǵan eki aýyl jigiti aýrýhanada em qabyldap jatyr. Óńir polıtseıleri bolsa, jedel izdestirý sharalarynyń nátıjesinde osy qylmysqa qatysy bar degen eki seziktini ustaǵan. Qalǵan kúdiktiler izdestirilip jatyr.

«Ustalǵandardyń biri Túrkistan oblysynyń, ekinshisi Shymkent qalasynyń turǵyny. Sońǵysynan ańshy myltyǵy alyndy. Ol qarý esepte joq bolyp shyqty. Odan bólek, taǵy alty kúdiktiniń tulǵasy anyqtaldy. Olarǵa izdeý jarııalandy. Qazirgi tańda osy oqıǵa boıynsha Qylmystyq kodekstiń «Adam óltirý» jáne «Buzaqylyq» baptarymen tirkeýge alynyp, tergeý amaldary júrgizilýde»,- deıdi Oblystyq ІІD baspasóz qyzmetiniń jetekshisi Saltanat Qarakózova. 

Eske salaıyq, biz buǵan deıin Shardara aýdanynyń Dostyq aýylynda dıqandar arasynda atys bolyp, bir jigit qaza tapqanyn habarlaǵan bolatynbyz.