Shardara aýdanynda mal baǵýǵa shyqqan 6 jasar bala kópirden qulap, sýǵa batyp ketti
ShARDARA. QazAqparat – Túrkistan oblysy, Shardara aýdanynda mal baǵýǵa shyqqan jasóspirim kópirden qulap, Qyzylqum kanalyna batyp ketken, dep habarlaıdy QazAqparat tilshisi.
Oblystyq Tótenshe jaǵdaılar departamentiniń málimetinshe, atalǵan oqıǵa búgin tańerteń saǵat 09:20-da aýdannyń sol jaǵalaý eldi mekeninen 1 shaqyrym jerde ornalasqan Qyzylqum magıstraldy kanalynda bolǵan. 6 jastaǵy Aıdos esimdi bala mal baǵyp júrip, abaısyzda bıiktigi 3 metr bolatyn, qorshaýsyz turǵan kópirden qulap ketken. Eni 50 metr al tereńdigi 2,5 metr bolatyn kanalǵa batyp ketken balany sol mańdaǵy jetkinshekter qutqaryp almaq bolǵan. 9 jastaǵy Janbolat Rahatuly esimdi bala sýǵa sekirip, ony sol mańda júrgen jergilikti turǵyndar qutqaryp qalǵan. Dosyn qutqaramyn dep ózi sýǵa batyp kete jazdaǵan bala dereý aýrýhanaǵa jatqyzylǵan. Onyń jaǵdaıyn dárigerler ortasha dep baǵalaýda.
«Qyzylqum kanalyna batyp ketken balany Túrkistan oblysy men Shymkent qalasynyń qutqarýshylary jáne Shardara aýdandyq polıtsııa bóliminiń 10 qyzmetkeri izdestirgen. Olarǵa aýyl turǵyndary da qolǵabys etip, 15 adam 1 júzý quralymen kómek kórsetken. Nátıjesinde 6 jastaǵy balanyń denesi sol mańda tabylyp, sýdan shyǵaryldy», delingen habarlamada.
