Shardara aýdanynda aýyl sharýashylyǵy eńbekkerleri marapattaldy
ShARDARA. QazAqparat – Túrkistan oblysy, Shardara aýdanynda aýyl sharýashylyǵy eńbekkerleri marapattaldy. Aýdannyń qurylǵanyna 55 jyl tolýyna oraı uıymdastyrylǵan dýmandy merekede aýdan ákimi Qaırat Joldybaı ala jazdaı egis basynda ter tókken dıqandar men tórt túlik mal órgizgen ozat sharýalarǵa alǵys hattar men syı-sııapattardy tapsyrdy, dep habarlaıdy QazAqparat tilshisi.
Saltanatty sharada aýdannyń mereı toıyna arnaıy qonaq bolyp qatysqan el aǵalary Orynbaı Rahmanberdıev pen Kenjehan Tólebaev, Abdýlla Ahmetov pen Isamýddın Rysbaev jáne Jappar Kárimovtar quttyqtaý sóz sóılep, jerlesteriniń qýanyshtaryn bólisti. Aqyn Qazybek Isa bıylǵy jyly 70 jasqa tolǵan jerles aqyn Qasqyr Serikbaevqa qazaq handyǵynyń 550 jyldyǵyna oraı shyǵarylǵan merekelik medaldi saltanatty jaǵdaıda tabys etti. Aýdandyq máslıhattyń hatshysy Bultbaı Mútálıev quttyqtaý sóz sóılep, aýdannyń áleýmettik-ekonomıkalyq damýyna úlesterin qosyp júrgen bir top azamattarǵa merekelik medal tabys etti. Olardyń arasynda eńbek ardagerleri, aýdandyq máslıhat depýtattary, sportshylarmen qatar aýdannyń jańalyqtaryn buqaralyq aqparat quraldarynda jarııalap júrgen bir top jýrnalıster de bar. Shara barysynda sondaı–aq, QR Mádenıet qaıratkeri, sazger Jalǵas Keńesovtiń «Týǵan jerge taǵzym» atty kontserti ótkizildi. Al, №16 kolledjde «Sán álemine saıahat» taqyrybymen ulttyq kıim jáne ulttyq qolóner buıymdarynyń baıqaýy uıymdastyryldy. Keshke qaraı «Alty alash» alańynda «Shardara – shattyq mekeni» atty óner juldyzdarynyń qatysýymen gala-kontsert uıymdastyrylyp, merekelik shara sońy otshashýǵa ulasty.
