Sharbaqty aýdanynda aýdan men aýyl ataýlary ózgermek - Pavlodar oblysy
Bul týraly óńirlik kommýnıkatsııalar qyzmetinde ótken baspasóz jıynynda Sharbaqty aýdanynyń ákimi Ázilhan Ábeýov málim etti.
"Sharbaqty aýdany ortalyǵynyń ataýy qujat boıynsha «Sharbaqty» dep atalsa, aýdan ataýy «Şerbakty» dep atalady. Ekeýi nege eki bólek bolyp qalǵanyn bilmeımin. Sondaı-aq aýdanymyzda 11 aýyldyq okrýg bar bolsa, onyń úsheýiniń ǵana ataýy qazaqsha. Qalǵan segiziniń, ıaǵnı 72 paıyzy orys tilinde. Meniń qarsylyǵym joq. Alaıda, ol ataýlardyń maǵynasy joq. Mysaly, Tatıanovka aýyly bar. Ol kim bolǵan, qandaı eńbek sińirgeni bizge beımálim. Galkıno aýyly da dál solaı. «Galıa» degen sózden shyqty ma, álde basqa maǵynada ataldy ma belgisiz. Biz qazir tarıhı ataýlar izdestirip jatyrmyz. Bul jumystyń barlyǵy jergilikti turǵyndarmen, aqsaqaldarmen aqyldasý arqyly atqarylýda. Ózine laıyq tarıhı ataý bergimiz keledi. Qazir aýyl ákimderine «Uly dalanyń jeti qyry» maqalasynyń aıasynda qysqasha beınejazba nemese vaın jasaýǵa tapsyrma berildi. Sol beınejazba arqyly óz aýyldarynyń atyn tanymal etýleri kerek", - dedi Ázilhan Ábeýov.
Aýdan basshysynyń aıtýynsha, qazirgi ýaqytta aýdan ataýyn «Sharbaqty», Galkıno aýylyn - tarıhı ataýy «Basqudyq», Arbıgen aýylyn «Arbaıgen» dep ózgertý jóninde oblystyq máslıhatqa usynys jiberilgen. Másele qarastyrylý ústinde.
Ázilhan Ábeýov sońǵy eki jylda Sharbaqty aýdanynda 31 kósheniń ataýy ózgergenin de atap ótti.
"Kóshe ataýlary boıynsha úlken jumys atqaryp jatyrmyz", - dedi aýdan ákimi. - Aýdanymyzda 30-dan astam ult ókilderi bar. Báriniń quqyǵyn buzbaı, aqyldasyp sheshýdemiz. 2016 jyly - 18, 2017 jyly - 10, 2018 jyly - 3 kósheniń ataýy ózgertildi. 2019 jyly da osyndaı jumystar júrgiziledi. Men ózim qadaǵalaıtyn bolamyn.
Sonymen qatar, Sharbaqty aýdanynda aýyldardy biriktirý jumysy da júrgizilmek. 11 aýyldyq okrýgtiń tórteýi biriktirilip, jeti okrýg qalady. Onyń árqaısynyń turǵyn sany 2 myńnan asatyn bolady.
