Shara Jıenqulovanyń buryn jarııalanbaǵan sırek beınematerıaly tabyldy

ASTANA. KAZINFORM — Qazaqtyń tuńǵysh kásibı bıshisi Shara Jıenqulovanyń buryn jarııalanbaǵan sırek beınematerıaly anyqtaldy, dep habarlaıdy QR Mádenıet jáne aqparat mınıstrliginiń baspasóz qyzmeti.

Qazaqtyń alǵashqy kásibı bıshisi, Qazaqstannyń halyq ártisi Shara Jıenqulovanyń sırek beınematerıaly «Arhıv-2025» memlekettik baǵdarlamasy aıasynda Reseı Federatsııasynyń Krasnogorsk qalasyndaǵy Reseı memlekettik kınofotoqujattar arhıvinen tabyldy.

— Bıshiniń «Bıpyl» halyq ánine myń burala bılegen beınejazbasy Qazaqstan Respýblıkasy Ortalyq memlekettik kıno-fotoqujattar men dybys jazbalary arhıvinde saqtaýly. Saraptaý nátıjesinde beınematerıaldyń 1958 jylǵy 21 jeltoqsanda ótken Qazaq ádebıeti men óneriniń onkúndiginiń qorytyndy kontserti kezinde túsirilgeni belgili boldy. Atalǵan onkúndik — qazaq halqynyń mádenıeti men ónerin búkil Keńes Odaǵyna tanytqan alǵashqy iri mádenı oqıǵalardyń biri sanalady. 1934 jyly Shara Jıenqulova M. Áýezovtiń «Aıman — Sholpan» spektaklinde tuńǵysh ret qazaqtyń «Kelinshek» atty ulttyq bıin bılep shyqqan, — delingen mınıstrlik taratqan aqparatta.

Sondaı-aq Evgenıı Brýsılovskııdiń «Qyz Jibek», «Jalbyr» jáne «Er Tarǵyn» operalarynda ulttyq bıdi keńinen tanytyp, qazaq sahnasynyń sımvolyna aınaldy.

Budan buryn Ulttyq kitaphana jańa sırek qoljazbamen tolyqqanyn jazǵan edik.