Shara Jıenqulova sııaqty ulttyq ónerdiń tanymal tulǵalary qazaq qyzdarynyń rýhyn kóterýi tıis - D.Myńbaı
ASTANA. 23 mamyr. QazAqparat - Búgin Astanadaǵy Kúlásh Baıseıitova atyndaǵy ulttyq opera jáne balet teatrynda Qazaq SSR Memlekettik syılyǵynyń laýreaty, Halyq ártisi, halyq arasynda «bı padıshasy» atanǵan Shara Jıenqulovanyń 100 jyldyǵyna
arnalǵan kontsert ótti.
Kontserttiń ashylý rásimine qatysqan QR Mádıet jáne aqparat mınıstri Darhan Myńbaı atap kórsetkendeı, Shara Jıenqulova sııaqty tanymal óner tulǵalarynyń mereıtoıyn atap ótý bastamasy qazaq qyzdarynyń rýhyn kóterýi tıis. «Shyny kerek, Shara apamyzdyń halqymyzdyń salt-sanasyna sińgen bıin úlken sahnalarǵa alyp shyqqany tarıhta máńgilikke qalady. Odan tálim-tárbıe alǵan talaı bıshiler áli de bolsa qazaq ónerin búkil álemge tanytýǵa múmkindigi kóp dep oılaımyn. Sebebi qaı jaǵynan alyp qarasaq ta, qazaq óneri - básekege qabiletti óner. Shara Jıenqulova - 16 jasta Máskeýdiń sahnasyna shyǵyp, halyqtyń súıispenshiligine bólengen adam. Al onyń nagradalary sol súıispenshiliktiń aıqyn kórinisi bolsa kerek. Shara apamyzdyń izin áli talaı qazaq qyzdary basady dep senemin», - dedi óz sózinde D.Myńbaı.
Shara Jıenqulovanyń 100 jyldyǵyna arnalǵan kontsertte elimizge tanymal ánshiler - Ardaq Balajanova, Mádına Besbaeva, Aqmaral Qaınazarova, Berik Omarov, sondaı-aq «Shylqyma», «Shabyt», «Serper», «Naz» sııaqty ujymdar óz ónerlerin ortaǵa saldy.
