«Shapaǵat» ónertapqyshtar konkýrsy jańa formatta ótkizilmek
ASTANA. QazAqparat - «Shapaǵat» ónertapqyshtar konkýrsy jańa formatta ótkizilmek, dep habarlaıdy QR Ádilet mınıstrliginiń baspasóz qyzmeti.
QR Ádilet mınıstrligi men «Ulttyq zııatkerlik menşik ınstıtýty» halyq arasynda ónertapqyshtyq belsendilikti yntalandyrýǵa baǵyttalǵan jobany iske asyra bastady. Joba aıasynda «Shapaǵat» respýblıkalyq forým» ınternet-resýrsy ázirlendi, onda elektrondyq formatta Ónertabystar jármeńkesi, «Shapaǵat» respýblıkalyq konkýrsy jáne jas ónertapqyshtar arasynda «Bolashaq seniń qolyńda: oılap tap ta jasampaz bol» konkýrsy ótkiziledi.
«Shapaǵat» ónertapqyshtar konkýrsyna qatysý úshin ótinimderdi qabyldaý 26 sáýirden bastalady jáne 26 maýsymda aıaqtalady. Internet resýrstardy paıdalanýshylar arasynda daýys berý 27 maýsymnan 30 qyrkúıekke deıin ótedi. Qorytyndylary 2017 jylǵy 15 qazanda jasalady.
Oqýshylar arasyndaǵy «Bolashaq seniń qolyńda: oılap tap ta jasampaz bol» konkýrsyna Qazaqstan Respýblıkasynyń jalpy bilim berý mekemeleriniń 8-11 synyp oqýshylary qatysa alady. Konkýrs 2017 jylǵy 26 sáýirde bastalady jáne 30 qyrkúıekke deıin jalǵasady.
Ónertabystar jármeńkesi ónertapqyshtarǵa óz ónertabystaryn ózindik jyljytýǵa, qosymsha málimetterdi ornalastyrýǵa, óz ónertabystaryn óndiriske engizý úshin bıznes seriktesterdi izdeýge múmkindik beredi. Óz kezeginde áleýetti ınvestorlar jármeńke alańynda ornalasqan ónertabystarǵa qol jetkize alady. «Shapaǵat» ónertapqyshtar konkýrsy aıasynda ınternet paıdalanýshylar áleýmettik jeliler arqyly onlaın-daýys berý jolymen olardyń oıynsha eń jaqsy degen ónertapqyshtardy tańdaıdy.
Baıqaýǵa qatysty málimetterdi tolyǵyraq adilet.gov.kz jáne kazpatent.kz saıttarynan alýǵa bolady.
