«Shapaǵat» bazaryn satyp alýshy tabylmaı jatyr
ASTANA. QazAqparat - Elordadaǵy «Shapaǵat» kommýnaldyq bazary» JShS-in satyp alatyn áleýetti ınvestor tabylmaı jatyr. Bul týraly búgin «Astana» Áleýmettik-kásipkerlik korporatsııasy» AQ basqarmasynyń tóraǵasy Nurlan Jaqypov aıtty, dep habarlaıdy QazAqparat tilshisi.
«Úkimettiń 2017 jylǵy 11 sáýirdegi №194 qaýlysyna sáıkes básekelestik ortaǵa beriletin táýekeldi kompanııalar, ulttyq holdıngter men enshiles kompanııalardyń tizimine «Shapaǵat» kommýnaldyq bazary da kirdi. Básekelestiktik ortaǵa berý týraly usynysty Ulttyq ekonomıka mınıstrliginiń Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıteti jasady. «Shapaǵat» bazarynyń qalanyń azyq-túlik qaýipsizdigin qamtamasyz etý aıasyndaǵy strategııalyq mańyzyn eskerip, «Astana» Áleýmettik-kásipkerlik korporatsııasy quzyrly organdarǵa bazardy jekeshelendirmeý týraly birneshe hat joldaǵan bolatyn. Alaıda Ekonomıkany jańǵyrtý jónindegi memlekettik komıssııanyń 2018 jyldyń 25 maýsymdaǵy sheshimine sáıkes bizge «Shapaǵat» kommýnaldyq bazaryn básekelestik ortaǵa ótkizý týraly jumystardy jalǵastyrý tapsyryldy», - dedi ol.
Memlekettik komıssııanyń sheshimin oryndaý maqsatynda «Astana» ÁKK 2018 jyldyń qarasha aıynda «Shapaǵat» bazarynyń ÁKK-ǵa tıesili jarǵylyq kapıtalyndaǵy 100 paıyz úlesin memlekettik tizilim portalynda tender arqyly satý týraly sheshim shyǵarǵan.
«Nysannyń qunyn anyqtaý maqsatynda satý aldyndaǵy daıyndyq jumystaryn júrgizildi. Berilgen esepke sáıkes onyń quny 1 mlrd 130 mln teńgeni qurady. Sondaı-aq tenderlik komıssııa birqatar talap bekitti. Atap aıtqanda, seriktestik qyzmet kórsetý baǵdaryn satý-satyp alý kelisimsharty jasalǵan merzimnen bastap 10 jyl ishinde ózgertpeý, saýda oryndaryn jalǵa alý baǵasyn 3 jyl ishinde ózgertpeý, tasymaldaýshy usynatyn baǵadan áleýmettik mańyzy bar taýarlarǵa qoıylatyn ústeme baǵany kelisimshart jasalǵan merzimnen 10 jyl boıy 10 paıyzdan asyrmaıtyn deńgeıde qaldyrý syndy talaptar bar», - dedi ol.
Onyń dereginshe, bazar 11 jáne 27 jeltoqsan kúnderi elektrondy saýda memlekettik tizilim portalynda satylymǵa shyǵarylǵan. Alaıda áleýetti satyp alýshylardyń sany ekeýden aspaǵandyqtan ótpegen. Kelesi saýda-sattyq 2019 jyldyń qańtar aıyna josparlanyp otyr.
