«Shapaǵat-2013» ónertapqyshtar baıqaýynyń jeńimpazdary marapattalady
ASTANA. 21 mamyr. QazAqparat - 23 mamyrda Astanada VІ Astana ekonomıkalyq forýmy sheńberinde «ShAPAǴAT-2013» ónertapqyshtyq salasyndaǵy jetistikterdiń respýblıkalyq baıqaýynyń jeńimpazdaryn saltanatty marapattaý rásimi ótkiziledi.
Atalǵan is-sharanyń qatysýshylary 2012 jyly berilgen jáne jarııalanǵan ónertabystarǵa qoldanystaǵy ınnovatsııalyq patentteri bar, ulttyq patent ıelenýshileri bolyp tabyldy. Bul týraly Ádilet mınıstrligi
Zııatkerlik menshik quqyǵy komıtetiniń baspasóz qyzmetinen habarlandy.
Baıqaýdyń maqsaty elimizdegi zııatkerlik menshiktiń rólin arttyrý, ónertapqyshtyq qyzmetti jandandyrý, ınnovatsııany damytýdy yntalandyrý bolyp tabylady. Ónertapqyshtyq jáne ınnovatsııalyq salaǵa ınvestıtsııa tartý jáne óndiristik sektorǵa perspektıvaly usynymdardy engizý kózdeledi.
Budan basqa, ónertapqyshtardy kótermeleý jáne Qazaqstan Respýblıkasynda ónertapqyshtyq qyzmetti belsendirý maqsatynda «Qazaqstan Respýblıkasyna eńbegi sińgen ónertapqyshy» konkýrsy ótkizilgen bolatyn. Soǵan oraı qurmetti ataqty ıemdený týraly dıplomdar men eskertkish lentalar beriletini kútiledi.
Marapattaý saltanatynyń sheńberinde óndiriske engizilgen, qyzyqty jáne perspektıvaly ónertabystardyń kórmesi uıymdastyrylady. Sonymen qatar Qazaqstan Respýblıkasy Ádilet mınıstrligi Zııatkerlik menshik quqyǵy komıteti basshylyǵynyń qatysýymen BAQ ókilderine arnalǵan brıfıng ótkiziledi. Marapattaý rásimi Qazaqstan estradasy juldyzdarynyń qatysýymen saltanatty túrde ótkiziledi.
