Cyr ónerpazdary Lıýksembýrgte qazaq mádenıetin dáriptedi
QYZYLORDA. KAZINFORM — Syr óńiri óner sheberleriniń Eýropadaǵy gastroldik sapary aıasynda Lıýksembýrg Uly Gertsogtiginde Qyzylorda oblystyq fılarmonııasynyń kontserti ótti. «Shanyraq Fest Luxembourg» mádenı bastamasy sheńberinde uıymdastyrylǵan keshte qazaq halqynyń baı mýzykalyq jáne folklorlyq murasy kórermen nazaryna usynyldy.
Mádenı is-shara Qazaqstan Respýblıkasynyń Belgııa Koroldigi men Lıýksembýrg Uly Gertsogtigindegi elshiligi, oblys ákimi Murat Nálqojaulynyń jáne ERG qoldaýymen uıymdastyryldy.
Óner sapary osydan birneshe aı buryn Nurlybek Mashbekulynyń bastamasymen josparlanyp, qarajaty sheshilgen bolatyn.
Qyzylorda oblysynyń ákimdigi málimetinshe, Kontsertke Lıýksembýrgtiń memlekettik mekemeleriniń ókilderi, dıplomatııalyq korpýs músheleri, kásipkerler, mádenıet salasynyń qyzmetkerleri, sondaı-aq osy elde turatyn qazaqstandyqtar men stýdent jastar qatysty.
Keshte Qazaqstannyń Lıýksembýrgtegi elshisi Roman Vasılenko quttyqtaý sóz sóılep, mádenıet pen ónerdiń halyqtardy jaqyndastyratyn mańyzdy rýhanı qundylyq ekenin atap ótti. Sonymen qatar mundaı bastamalar memleketter arasyndaǵy dostyq qarym-qatynasty nyǵaıtyp, halyqtardyń bir-biriniń tarıhy men dástúrin tereńirek tanýyna yqpal etetinin jetkizdi.
Mádenıet salasynyń úzdigi Ázıza Іzdiqulova rejısserlik etken kontserttik baǵdarlamada Syr óńiriniń baı mýzykalyq murasy keńinen nasıhattalyp, ulttyq folklor, kúı óneri men jyraýlyq dástúr kórermen nazaryna usynyldy. Ónerpazdar oryndaýyndaǵy shyǵarmalar arqyly Uly dalanyń rýhy men qazaq halqynyń mádenı ereksheligi sheteldik kórermenge keńinen tanystyryldy.
Kesh qorytyndysynda ónerpazdar «Atameken» ánin oryndap, qazaq mádenı keshiniń áserli fınalyna aınaldyrdy.
