«Shańyraq» shyǵarmashylyq baıqaýynyń jeńimpazdary marapattaldy (FOTO)

ASTANA. QazAqparat - Búgin, 27 qarashada QR Mádenıet jáne sport mınıstrliginiń uıymdastyrýymen Qazaqstan halqy Assambleıasynyń etnojýrnalıstıka salasyndaǵy respýblıkalyq «Shańyraq» shyǵarmashylyq baıqaýynyń jeńimpazdary marapattaldy.

Atalǵan saltanatty keshke QR Parlamenti Májilisiniń depýtattary, QHA, etnomádenı ortalyqtardyń jetekshileri, BAQ ókilderi qatysty.

Jyl saıyn uıymdastyrylatyn sharaǵa 70-ten astam maqala kelip tústi. Olardyń ishinde Tatıana Jangıldına, Ernur Nurǵalıev, Gúlmıra Jandybaeva, Malıka Ǵalıeva, Nurbek Ámısha jasaǵan materıaldar túrli atalymdar boıynsha úzdik dep tanyldy.

«Bıylǵy baıqaý byltyrǵy baıqaýdan ózgerek boldy. Bul shara Elbasynyń jarııalaýymen Qazaqstan halqy Assambleıasynyń jylyna daıyndyq retinde jasaldy. Dodaǵa qatysqan jýrnalısterdiń sany da, sapasy da artqan. Kelesi jyly budan da joǵary bolady degen senimimiz mol», - dedi L.Gýmılev atyndaǵy Eýrazııa ulttyq ýnıversıteti jýrnalıstıka jáne saıasattaný fakýltetiniń dekany, qazylar alqasynyń múshesi Qaırat Saq.

Baıqaý jeńimpazdaryna uıymdastyrýshylar tarapynan baǵaly syılyqtar men dıplomdar tabystalyp, kesh Qazaqstan etnomádenı ortalyqtary óner ujymdarynyń kontserttik baǵdarlamasyna ulasty.