«Shańyraq» ilki jobasyna qatysýshylarǵa kredıt berý úshin 210 mlrd teńge bólinedi

NUR-SULTAN. QazAqparat – «Shańyraq» ilki jobasyna qatysýshylarǵa kredıt berý úshin 210 mlrd teńge bólinedi. Bul týraly QR Indýstrııa jáne ınfraqurylymdyq damý mınıstrliginen málim etti, dep habarlaıdy QazAqparat tilshisi.

«Memleket basshysy Qasym-Jomart Toqaev Tótenshe jaǵdaı jónindegi memlekettik komıssııanyń 11 mamyrdaǵy qorytyndy otyrysynda atap ótkendeı, «5-10-20» nesıelik turǵyn úımen qamtamasyz etý boıynsha jańa joba iske qosylady. Azamattardyń suranysyn qoldaý jáne «Shańyraq» ilki jobasyna qatysýshylarǵa kredıt berý úshin «Báıterek» UBH» AQ Qazaqstan Respýblıkasynyń Ulttyq bankinen alynǵan oblıgatsııalyq qaryz aıasynda Qazaqstannyń turǵyn úı qurylys jınaq bankine 210 mlrd teńge bóledi», - delingen mınıstrliktiń Telegram paraqshasynda jarııalanǵan aqparatta.

«Shańyraq» ilki jobasynyń qatysýshylary Qazaqstan Respýblıkasynyń «Turǵyn úı qatynastary týraly» Zańyna sáıkes turǵyn úıge muqtajdar esebinde turǵan azamattar (budan ári - JAO-da kezekte turǵan adamdar) bola alady.

Qatysýshylarǵa qoıylatyn negizgi talaptar:

Qazaqstan Respýblıkasynyń azamattyǵy; otbasynyń árbir múshesine sońǵy 6 (alty) aı úshin eńbek jáne (nemese) kásipkerlik qyzmetten (zeınetaqy aýdarymdaryn, jeke tabys salyǵyn jáne ózge de mindetti aýdarymdardy esepke almaǵanda) tıisti qarjy jylyna arnalǵan respýblıkalyq bıýdjet týraly zańda bekitilgen eń tómengi kúnkóris deńgeıiniń 3,1 eselengen shamasyn qosa alǵanda, tabystyń bolýy;

JAO Qazaqstan Respýblıkasynyń «Turǵyn úı qatynastary týraly» Zańyna sáıkes turǵyn úıge muqtaj mártebesin jáne turǵyn úıge muqtaj retinde esepke qoıýdy rastaýy;

tólem qabilettiligin rastaý.