«Shańyraq» baǵdarlamasy boıynsha beriletin 8000 páter Baspana.kz saıtyna shyǵarylady
NUR-SULTAN. QazAqparat – Bıyl «Shańyraq» baǵdarlamasy boıynsha 800 myń páter beriledi, dep habarlaıdy QazAqparat tilshisi.
Bul týraly «Otbasy bank» AQ basqarma tóraǵasy Lázzat Ibragımova aıtty.
«Baqytty otbasy» baǵdarlamasyna ótinim berip, talaptaryna sáıkes kelmeı qalǵan otbasylarǵa «Shańyraq» baǵdarlamasyn usynamyz. Onda da alǵashqy jarna –10 paıyz, al jyldyq mólsherleme – 5 paıyz. Bastapqy naryqtaǵy úı ǵana satyp alynýy kerek. Ondaı baspanany jeke qurylys kompanııalary da salýy múmkin, «Qazaqstan turǵyn úı kompanııasy» kepildendirgen úı bolýy da múmkin. «Nurly jer» baǵdarlamasynyń aıasynda salynǵan úılerdi ákimdiktermen birge osy baǵdarlama arqyly berýdi josparlap otyrmyz. Qazir osy úılerge suranys kóp. Mamyr aıynyń ishinde 8000-ǵa jýyq páter Baspana.kz saıtynda qatysady. Munda da «Shańyraq» baǵdarlamasyna qatysýshylar esepke turǵan jylyna qaraı baspanaly bolady», - dedi bank basshysy.
Lázzat Ibragımovanyń málimeti boıynsha, búginge deıin «Baqytty otbasy» baǵdarlamasynyń aıasynda 9800-den astam otbasy qonys toıyn toılaǵan. Bıyl olardyń sany taǵy 5 myńǵa kóbeımek.
«Jyl sońyna deıin «Nurly jer» baǵdarlamasy arqyly baspanamen qamtylǵan otbasylardyń sanyn eki ese arttyrýdy josparlap otyrmyz. Jyl sońynda jeńildetilgen baǵdarlamalar aıasynda 10 paıyzdyq alǵashy jarna tóleý arqyly baspanaly bolǵan otbasylardyń sanyn 20 myńǵa jetkizemiz dep oılaımyz», - dedi bank tóraıymy.
Buǵan deıin habarlaǵanymyzdaı, osy sharada birjolǵy zeınetaqy tólemderin paıdalaný qaǵıdalaryna tolyqtyrýlar engiziletini málim boldy.
Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaevtyń aıtýynsha, budan bylaı baspana kezeginde bazaǵa qaıta engizýge jol berilmeıdi.
