«Shanshar» teatry astanalyq kórermenderge merekelik kóńil-kúı syılady
ASTANA. 9 naýryz. QazAqparat - Keshe «Jastar» saraıynda «Shanshar» ázil-syqaq teatry Elorda jurtshylyǵyna ázil-qaljyńyn aıtyp, kóńilderin bir jelpindirip tastady.
Bul «Shanshardyń» 8 naýryz - halyqaralyq áıelder kúni merekesine oraı aq jaýlyqty analarǵa, arýlar men qyzdarǵa arnaǵan tartýy bolatyn.
«Shanshar» ázil-syqaq teatrynyń dırektory Ýálıbek Ábdiraıymov óz sózinde bizdiń qoǵamdaǵy analardyń róli, qyz-kelinshekterdiń ıbaly da ınabatty qasıetteri týraly oılaryn ádemi ázildermen jetkize bildi.
Bul joly «Shanshar» teatry astanalyqtarǵa jańa baǵdarlamasyn usynǵanyn aıta ketýimiz kerek. Teatr ártisteri búgingi qoǵamdaǵy jat qylyqtardy, qolyna bılik tıgenderdiń ersi áreketterin synap, ázil-qaljyń arqyly «jamannan jırený kerek» ekenin uǵyndyrdy. Intermedııalardyń arasynda analarǵa arnalǵan ádemi ánder shyrqaldy.
Bir sózben aıtqanda, «Shanshar» ázil-syqaq teatry astanalyq kórermenderge merekelik kóńil-kúı syılady.
