Shańqobyz, sazsyrnaı jáne Álııa: qazaqstandyq áskerı-mýzykalyq ujym Qyzyl alańda óner kórsetti
MÁSKEÝ. KAZINFORM — Astanada «Spassk munarasy» halyqaralyq áskerı-mýzykalyq festıvalinde sátti óner kórsetken shyǵarmashylyq topty saltanatty jaǵdaıda qarsy aldy. Bıyl XVII márte ótken bul festıval Jeńistiń 80 jyldyǵyna arnaldy. Bul týraly Qorǵanys mınıstrligi málim etti.
Qazaqstan Respýblıkasy Qarýly kúshteri Ulttyq áskerı-patrıottyq ortalyǵynyń quramyndaǵy shyǵarmashylyq ujym – Ortalyq áskerı orkestrdiń mýzykanttary men ortalyq ansambldiń ártisteri kórermenge erekshe áser qaldyrdy. Qazaqtyń tanymal shyǵarmalarynyń áýenimen Qorǵanys mınıstrliginiń qurmet qaraýyl rotasy saptyq defıle kórsetti.
Keńes Odaǵynyń Batyry Álııa Moldaǵulovanyń týǵanyna 100 jyl tolýyna oraı halyqaralyq baıqaýlardyń laýreaty, «Jas sarbaz» shyǵarmashylyq stýdııasynyń tárbıelenýshisi Jasmına Túzelova «Álııa» ánin oryndap, jurtty tebirentti.
Qazaqstandyq toptyń ónerine erekshe serpin men shapshańdyq syılaǵan barabanshylar tobynyń shoýy boldy. Máskeýdegi Qyzyl alańda óner kórsetý bıyl 30 jyldyǵyn atap ótip otyrǵan Ortalyq áskerı orkestr úshin jyldyń mańyzdy oqıǵalarynyń biri boldy. Mýzykanttar áskerı rýh pen ulttyq boıaýdy úılesimdi jetkize bildi.
Dástúrli mýzykalyq aspaptarmen qatar, shańqobyz ben sazsyrnaıdyń da úni estildi.
– Biz buǵan muqııat daıyndaldyq. Basty maqsatymyz – patrıottyq rýhty, tarıhı jadymyzdy jetkizip, ulttyq bolmysymyzdy aıqyndaý boldy. Baǵdarlamaǵa maıdanger-kompozıtor Nurǵısa Tilendıevtiń «Týǵan el», «Sarjaılaý», «Óz elim» sııaqty halyq rýhynyń sımvolyna aınalǵan týyndylary endi, – dedi bas áskerı dırıjer podpolkovnık Almas Ibragımov.
«Spassk munarasy – 2025» festıvaline Reseı, Azııa, Eýropa jáne Afrıka elderinen 25 shyǵarmashylyq ujym jınalǵanyn aıta ketý kerek. Qazaqstandyq ansambldiń óneri mádenı dıplomatııany damytýǵa, áskerı-patrıottyq baılanysty nyǵaıtýǵa jáne qazaq mýzyka dástúrin álemdik deńgeıde nasıhattaýǵa qosylǵan eleýli úles boldy.
Aıta keteıik, Shymkentte áskerı kolledj ashyldy.